वरिष्ठ अधिवक्ता दिनेश त्रिपाठी र अधिवक्ता प्रेमराज सिलवालले शुक्रबार सर्वोच्चमा रिट निवेदन पेश गरेका छन्। यद्यपि, उक्त रिट हाल अध्ययनकै क्रममा रहेको र दर्ता प्रक्रियामा रहेको जनाइएको छ।
के छ रिटमा ?
निवेदकहरूले संवैधानिक परिषद्को निर्णय संविधानको शक्ति पृथकीकरणको सिद्धान्त र स्वतन्त्र न्यायपालिकाको मर्मविपरीत भएको दाबी गरेका छन्। रिटमा चौथो वरीयताका न्यायाधीश डा. मनोजकुमार शर्मालाई गरिएको सिफारिस खारेज हुनुपर्ने र वरीयताको पहिलो नम्बरमा रहेकी कायममुकायम प्रधानन्यायाधीश सपना प्रधान मल्ललाई प्रधानन्यायाधीशमा सिफारिस गरिनुपर्ने माग गरिएको छ ।
बिहीबार बसेको संवैधानिक परिषद्को बैठकले रोलक्रममा अगाडि रहेका कायममुकायम प्रधानन्यायाधीश सपना प्रधान मल्ल, न्यायाधीश कुमार रेग्मी र हरिप्रसाद फुयाललाई पन्छाउँदै चौथो स्थानका शर्मालाई सिफारिस गर्ने निर्णय गरेको थियो। यस निर्णयमा परिषद्का सदस्यहरूबीच नै मतैक्य हुन सकेको थिएन। बैठकमा राष्ट्रिय सभाका अध्यक्ष नारायणप्रसाद दाहाल र प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले ’नोट अफ डिसेन्ट’ (असहमतिको पत्र) लेखेका थिए।
