यसअघि उत्साहपूर्णरूपमा दर्शकको उपस्थिति रहेको फेस्टमा यसपटकका लागि एक सय ५० बढी स्टलहरू रहने आयोजकले जनाएको छ । फेस्टमा स्टल राख्न चाहनेका लागि स्टल बुकिङ खुला गरिएको आयोजक ‘घर निर्माण फाउण्डेसन’ले जनाएको छ । उत्पादन तथा सामग्रीबारे समेत फेस्टमा स्टल राखी ग्राहकसम्म पुर्याउन सक्ने बताइएको छ । स्टल बुकिङका लागि काठमाडौंको बबरमहलस्थित फाउण्डेसनको कार्यालयमा सम्पर्क गर्न आयोजकले भनेको छ ।
अव्यवस्थित निर्माण क्षेत्र व्यवस्थित बनाउन, मन्दी अवस्थामा रहेको आर्थिक गतिविधि चलायमान बनाउन तथा निर्माण क्षेत्रका लागि आवश्यक पर्ने दक्ष जनशक्ति र निर्माण कम्पनीबीच सम्बन्ध स्थापित गर्न फेस्ट आयोजना गर्न लागिएको फाउण्डेसनले जनाएको छ ।
आयोजकका अनुसार आधुनिक निर्माण प्रविधि र सामग्रीको प्रयोग बढाउन, घर निर्माणको तयारीदेखि अन्तिम चरणसम्मको जानकारी एउटै थलोबाट दिने उद्देश्य फेस्टले राखेको छ । यसअघि गत पुसमा भएको दोस्रो संस्करणको फेस्टमा ६० हजार बढीले अवलोकन गरेका थिए भने तीन अर्ब बढीको कारोबार भएको थियो । फेस्टमा प्रत्यक्ष अन्तरक्रिया, विशेषज्ञ मार्गदर्शन र ब्राण्डिङ परामर्शमार्फत् व्यवसायीले लक्षित ग्राहकसम्म आफूलाई प्रभावकारीरूपमा पुर्याउन सक्नेछन् ।
फेस्टमा निर्माण व्यवसायी र सरोकारवालासँग निर्माण क्षेत्रमा रहेका समस्या, समाधानका उपाय र गुणस्तरीय निर्माणका लागि अपनाउनुपर्ने उपायबारे समेत छलफल हुनेछ भने अवलोकनतकर्ताले निर्माणका क्रममा अपनाउनुपर्ने सावधानी, ध्यान दिनुपर्ने पक्ष तथा कम लागतमा गुणस्तरीय निर्माणका लागि अपनाउन सकिने प्रक्रियाबारे परामर्श लिन पाउनेछन् । विभिन्न निर्माण सामग्री उत्पादक र व्यवसायीले प्रदान गर्ने प्रयोगका तरिकाबारेको जानकारीसमेत पाइनेछ ।
