आफ्नो सम्पत्तिसँग सम्बन्धित महत्त्वपूर्ण कागजातहरू लुकाएको र अदालतको आदेशको अवज्ञा गरेको ठहर गर्दै अदालतले उनलाई 'अदालतको अवहेलना' मा दोषी ठहर गरेको हो।
अदालतका अनुसार, रवीन्द्रनले अप्रिल २०२४ देखि आफ्नो सम्पत्तिको विवरण उपलब्ध गराउन दिइएको आदेशलाई पटक-पटक बेवास्ता गर्दै आएका थिए। उनको यो ढिलासुस्ती र असहयोगलाई गम्भीरतापूर्वक लिँदै अदालतले उनलाई ६ महिनाको कैद सजाय सुनाउँदै तत्काल अधिकारीहरू समक्ष आत्मसमर्पण गर्न आदेश दिएको छ।
६७ लाख रुपैयाँ जरिवानाको फैसला
जेल सजायका अतिरिक्त अदालतले रवीन्द्रनलाई ९० हजार सिंगापुर डलर (करिब ६७ लाख नेपाली रुपैयाँ) जरिवाना समेत गरेको छ। यो रकम कानूनी खर्च (Legal Costs) को रूपमा भुक्तानी गर्नुपर्नेछ। साथै, उनलाई आफ्नो कम्पनी 'बीआर इन्भेस्टमेन्ट प्रा.लि.' को कानूनी स्वामित्व प्रमाणित गर्ने कागजातहरू पनि अदालतमा पेश गर्न आदेश दिइएको छ।
कतार इन्भेस्टमेन्ट अथोरिटीको उजुरी
रवीन्द्रन विरुद्धको यो मुद्दा कतारको सार्वभौम सम्पत्ति कोष 'कतार इन्भेस्टमेन्ट अथोरिटी' (QIA) को सहायक कम्पनीले सिंगापुरको अदालतमा दायर गरेको थियो। बाइजु गम्भीर वित्तीय संकटबाट गुज्रिरहेको र कर्मचारीहरूलाई बर्खास्त गरिरहेको समयमा कतारले सो कम्पनीमा ठूलो लगानी गरेको थियो। सजायको घोषणापछि रवीन्द्रनबाट हालसम्म कुनै आधिकारिक प्रतिक्रिया आएको छैन। उनी हाल कुन देशमा छन् भन्ने कुरा पनि स्पष्ट भइसकेको छैन।
अमेरिकी लगानीकर्ताहरूसँग पनि कानूनी लडाइँ
रवीन्द्रनले अहिले विश्वभरका विदेशी लगानीकर्ताहरूसँग कानूनी झमेलाको सामना गरिरहेका छन्। विशेषगरी अमेरिकी ऋणदाताहरूले बाइजुको वित्तीय अवस्था बिग्रन थालेपछि विवादास्पद बनेको १.२ अर्ब डलर (करिब १ खर्ब ६० अर्ब नेपाली रुपैयाँ) ऋण फिर्ताको माग गर्दै कानूनी लडाइँ लडिरहेका छन्।
रवीन्द्रनले स्थापना गरेको 'थिंक एण्ड लर्न प्राइभेट लिमिटेड' (बाइजु) कुनै समय भारतको सबैभन्दा सफल स्टार्टअप मानिन्थ्यो। उनलाई भारतीय स्टार्टअप जगतको सबैभन्दा ठूलो 'सफलताको कथा' र अर्बपति उद्यमीका रूपमा हेरिन्थ्यो। तर, पछिल्ला केही वर्षयता उनी र उनको कम्पनी गम्भीर आर्थिक संकट र कानूनी विवादको चक्रमा फसेका छन्।
