राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनको उद्घाटन शनिबार  भरतपुरको गेस्टहाउस चौरमा हुने भएको छ ।

घामपानी छेक्ने छानोसहितको ‘जर्मन ह्यांगर’भित्र उद्घाटन कार्यक्रम हुने भएको हो, बन्द शत्र भने चितवन उद्योग संघको सभाहलमा गरिदैंछ ।

उद्घाटन कार्यक्रमका लागि पाँच हजार कुर्सी राख्न मिल्ने गरेर ‘जर्मन ह्याङ्गर’का तीन खण्ड तयार हुने छन् । काठमाडौंको मिडिया स्पेस सोलुसनले ती संरचना बनाउँदै छ । उक्त कम्पनीका अधिकारीहरुका अनुसार मुख्य खण्डको आडमा दायाँबायाँ २० मिटर चौडा र ३० मिटर लम्बाइका थप दुईवटा खण्ड रहने छन् । दुई पाखे ह्याङ्गरको माथिल्लो उचाइ २४ फिट र छेउको उचाइ १६ फिट रहनेछ । पाँच हजार कुर्सीका साथै बिना कुर्सी पनि मान्छेहरू बस्न मिल्ने गरेर उद्घाटन स्थलमा ‘ह्याङ्गर’ तयार हुनेछ ।

जर्मन ह्याङ्गर (German Hangar)  आधुनिक पाल (Tent) प्रविधि हो, जसलाई इन्जिनियरिङको भाषामा 'क्लियर-स्प्यान ट्यान्ट' (Clear-span Tent) भनिन्छ। परम्परागत टेन्टको जस्तो यसको बीचमा कुनै पिलर वा खम्बाहरू हुँदैनन्, जसले गर्दा भित्रको सम्पूर्ण ठाउँ (१००%) इन्टेरियर स्पेस खुला र निर्बाध रूपमा प्रयोग गर्न पाइन्छ ।

उच्च गुणस्तरको आल्मुनियम एलोय (Aluminium Alloy) को फ्रेम र आगो तथा पानी नलाग्ने टेन्साइल फेब्रिक (PVC Coated) छत प्रयोग गरिने भएकाले यो हावाहुरी, घाम र मनसुनको पानी थेग्न निकै बलियो र सुरक्षित मानिन्छ।

नेपालमा कहिले र कसरी भित्रियो ?

नेपालमा परम्परागत बाँस, फलामका पाइप र कपडाका टेन्ट प्रयोग गर्ने चलन लामो समयदेखि थियो। तर, ठूला व्यापारिक मेला, अन्तर्राष्ट्रिय स्तरका प्रदर्शनी र ठूला राजनीतिक सम्मेलनहरूका लागि मौसम अनुकूल नहुँदा कार्यक्रम नै बिग्रने जोखिम सधैँ रहन्थ्यो।

नेपालमा व्यावसायिक रूपमा जर्मन ह्याङ्गर प्रविधि वि.सं. २०७२–२०७३ तिर भित्रिन थालेको हो। विशेष गरी काठमाडौँको भृकुटीमण्डपमा हुने ठूला अन्तर्राष्ट्रिय व्यापारिक मेलाहरूलाई लक्षित गरी इभेन्ट म्यानेजमेन्ट कम्पनीहरूले यो प्रविधि नेपाल भित्र्याएका हुन्।

सुरुवाती दिनहरूमा नेपालमा यसको आफ्नै प्रविधि र सामान पर्याप्त थिएन। नेपालका मिडिया स्पेस सोलुसन्स जस्ता ठूला प्रदर्शनी व्यवस्थापन गर्ने कम्पनीहरूले भारत र चीनका ठूला इभेन्ट आपूर्तिकर्ताहरूसँग सहकार्य गरेर भाडामा यो प्रविधि भित्र्याएका थिए। पछि, नेपालकै टेन्ट व्यवसायीहरू र विभिन्न इभेन्ट कम्पनीहरूले आफैँ यसको पार्टपुर्जाहरू खरिद गरी नेपालमै बनाउन थाले। अहिले नेपालमै ३० हजार वर्गफिट वा सोभन्दा ठूला ह्याङ्गरहरू सहजै जडान गर्न सक्ने प्राविधिक क्षमता उपलब्ध छ।