पछिल्लो समय निजी क्षेत्रका समस्या सुन्न र समाधानका लागि नीतिगत हस्तक्षेप गर्न सक्रिय देखिएका प्रधानमन्त्री शाहले आज नेपाल तयारी पोशाक उद्योग संघका पदाधिकारीहरूलाई छलफलका लागि बोलाएका हुन् ।
प्रधानमन्त्री तथा मन्त्रिपरिषद्को कार्यालयमा बिहान ११:३० बजे हुने उक्त भेटवार्तामा उद्योगको वर्तमान अवस्था, उत्पादन क्षमतामा देखिएका ह्रास र निर्यातका अवरोध हटाउने विषयमा केन्द्रित रहेर संवाद हुनेछ ।
निर्णायक वार्ताका लागि टोली बालुवाटारमा
छलफलमा संघका अध्यक्ष पशुपतिदेव पाण्डेको नेतृत्वमा एक उच्चस्तरीय टोली सहभागी हुँदै छ । टोलीमा प्रथम उपाध्यक्ष बसन्तराज अधिकारी, महासचिव भीमकुमारी गिरी, प्रमुख कार्यकारी अधिकृत सुयश खनाल र प्राविधिक सल्लाहकार प्रकाशकुमार झा रहेका छन् । व्यवसायीहरूले उद्योग टिकाउनै गाह्रो भइरहेको अवस्थामा राज्यले लिनुपर्ने नीतिगत स्पष्टता र सहुलियतका विषयमा प्रधानमन्त्रीलाई ‘ब्रिफिङ’ गर्ने तयारी गरेका छन् ।
मुख्य एजेन्डा: निर्यात र रोजगारी
नेपालको वैदेशिक मुद्रा आर्जनको बलियो स्रोत मानिएको तयारी पोशाक उद्योग पछिल्ला वर्षहरूमा बढ्दो उत्पादन लागत र अन्तर्राष्ट्रिय बजारमा देखिएको प्रतिस्पर्धाका कारण दबाबमा छ । आजको छलफल विशेषगरी निम्न बुँदामा केन्द्रित रहनेछ:
१. तयारी पोशाकको निर्यातमा देखिएका नीतिगत र व्यावहारिक झन्झट ।
२. आन्तरिक उत्पादन वृद्धि र रोजगारी सिर्जनाका लागि राज्यको प्रोत्साहन ।
३. उद्योग क्षेत्रको समग्र विकासका लागि आवश्यक भौतिक पूर्वाधार र सहुलियत ।
एक्सनमा प्रधानमन्त्री
प्रधानमन्त्री शाहले पछिल्लो समय उद्योगी र सरोकारवालासँग केवल औपचारिकताका लागि मात्र नभई, परिणाममुखी नतिजा निकाल्ने गरी संवाद गरिरहेका छन् । समस्या सुन्ने, समाधानका उपाय खोज्ने र तत्काल कार्यान्वयनका लागि सम्बन्धित मन्त्रालय वा निकायलाई निर्देशन दिने उनको कार्यशैलीले व्यवसायीहरूमा आशा जगाएको छ ।
आजको भेटले निर्यातमुखी उद्योगहरूका लागि नयाँ मार्गचित्र तय गर्ने र सुस्ताएको गार्मेन्ट क्षेत्रलाई पुनर्जीवन दिने अपेक्षा गरिएको छ ।
