“यो प्रलयका कारण नेपालमा लगानी गर्नु हुँदैन भन्ने धारणा बन्नु हुँदैन,” उनले भने, “यस्तो असाधारण प्राकृतिक विपत्तिलाई आधार बनाएर नेपालमा लगानीको वातावरण नै जोखिमपूर्ण छ भन्ने धारणा बनाउनु उचित हुँदैन ।”
उनले हजारौँ वा पाँच हजार वर्षमा एकपटक आउने खालको असाधारण प्रलयलाई आधार बनाएर नेपालमा लगानी नै गर्न नहुने निष्कर्ष ननिकाल्न जोड दिए । यस्ता घटनालाई आधार मानेर जलविद्युत् आयोजनाको डिजाइन मापदण्ड अत्यधिक कडा बनाउँदै गए आर्थिक रूपमा सम्भव नहुने अवस्था आउन सक्ने उनको भनाइ थियो ।
“हजारौँ वर्षमा एकपटक आउने असाधारण घटनालाई आधार बनाएर आयोजनाको डिजाइन मापदण्ड निर्धारण गरियो भने हाम्रा परियोजनाहरू आर्थिक रूपमा अव्यावहारिक हुन सक्छन्,” उनले भने ।
यद्यपि, जलविद्युत् आयोजना निर्माण गर्दा सुरक्षा पक्षलाई बेवास्ता गर्न नहुनेमा उनले जोड दिए । प्राकृतिक विपद्बाट आयोजना सुरक्षित रहने गरी आवश्यक मापदण्ड र पर्याप्त ‘सेफ्टी मार्जिन’ राखेर निर्माण गरिनुपर्ने उनले बताए ।“जोखिमलाई ध्यानमा राख्दै पर्याप्त सुरक्षा मापदण्ड र उचित सुरक्षा मार्जिन भने अनिवार्य रूपमा राख्नुपर्छ,” उनले भने ।
असाधारण प्राकृतिक घटनालाई लिएर लगानी निरुत्साहित गर्नेभन्दा सम्भावित जोखिमको वैज्ञानिक मूल्यांकन गर्दै सुरक्षित र व्यावहारिक ढंगले जलविद्युत् आयोजना विकास गरिनुपर्ने उनले बताए ।
