धितोपत्र बोर्डको निर्देशन अनुसार दुईभन्दा बढी डिम्याट खाता सञ्चालन गरिरहेका लगानीकर्ताहरुले दुईभन्दा बढी खाता भएमा त्यस्ता खाता बन्द गर्नुपर्ने हुन्छ । खाता बन्द नगर्ने लगानीकर्ताको जुनसुकै समयमा पनि कारोबार रोकिन सक्छ ।
नेपाल धितोपत्र बोर्डले गत असार ११ गते दुई भन्दा बढी खाता सञ्चालन गरेका हितग्राहीको खाता बन्द गराउन सिडिएससिलाई निर्देशन दिएको थियो । बोर्डको निर्देशन अनुसार सिडिएससीले कात्तिक २६ गते सूचना प्रकाशित गरी त्यस समयसम्म दुई भन्दा बढी खाता प्रयोग गरिहेका हितग्राहीलाई ३५ दिनभित्र खाता बन्द गर्न भनेको थियो ।
लगानी व्यवस्थापनमा सहभागी हुने लगानीकर्ताको हकमा लगानी व्यवस्थापनमा सहभागी हुनका लागि दुई भन्दा बढी डिम्याट खाता खोल्न पाउने व्यवस्था बोर्डको निर्देशनमा रहेको छ ।
धितोपत्र बोर्डको निर्देशन अनुसार आस्वा प्रणाली लागू भएसँगै यसको बाँडफाँड प्रणालीको कार्यान्वयनलाई प्रभावकारी बनाउन तथा लगानीकर्ता र बजारको दीर्घकालीन हितलाई समेत दृष्टिगत गरी एक ग्राहकले दुई भन्दा बढी डिम्याट खाता खोल्न नपाउने व्यवस्था लागू गरिएको सिडिएससीको प्रमुख कार्यकारी अधिकृत देवप्रकाश गुप्ताले मेराेलगानीसँग बताए ।
गुप्ताले यसअनुसार अधिकांश लगानीकर्ताले सीमाभन्दा धेरै रहेको खाता बन्द गरिसकेको जानकारी दिँदै असार मसान्तसम्ममा निर्देशनको पूर्ण परिपालना भइसक्ने उनको भनाई छ ।
सिडिएससीले दुई भन्दा बढी डिम्याट खाता सञ्चालन गर्ने हितग्राहीको सम्पूर्ण खाताहरु रोक्का गर्ने चेतावनी यस अघि नै पटक पटक सार्वजनिक सूचना जारी गरेर दिइसकेको छ ।
यसअनुसार धेरै लगानीकर्ताले सीमाभन्दा बढी रहेको खाता बन्द पनि गरिसकेको छन् । तर अझैपनि दुईभन्दा बढी खाता सञ्चालन गर्नेको खाता कुनैपनि समयमा सिडिएससीले बन्द गर्नसक्छ । यसतर्फ लगानीकर्ताको ध्यान पुग्न जरुरी छ ।
बोर्डको व्यवस्था अनुसार २०७४ भदौ मसान्तसम्म खाता बन्द गर्ने लगानीकर्ताको एउटा खाताबाट अर्को खातामा गरिने हस्तान्तरण शुल्क समेत निशुल्क गरिएको थियो ।
लगानीकर्ताको वास्तविक संख्या समेत यकिन गर्न र डिम्याट खाता सञ्चालन कार्य थप व्यवस्थित तथा पारदर्शी बनाउन बोर्डले सो निर्देशन कार्यन्वयनमा ल्याएको हो । हालसम्म लगानीकर्ताले १२ लाख ४४ हजार ८१३ वटा डिम्याट खाता खोलेका छन् । यसमा कतिपय लगानीकर्ताको दुईभन्दा बढी खाता हुनसक्छ ।