कम्पनीको गत शुक्रबार बसेको सञ्चालक समिति बैठकले १ः१ अनुपातमा हकप्रद जारी गर्ने प्रस्ताव आगामी वार्षिक साधारण सभामा लैजाने निर्णय गरेको हो ।
हाल कम्पनीको चुक्ता पूँजी १० अर्ब रुपैयाँ छ । शतप्रतिशत हकप्रद बिक्रीपछि कम्पनीको चुक्ता पूँजी २० अर्ब रुपैयाँ पुग्नेछ ।
कम्पनीले अघिल्लो आर्थिक बर्षमा सेयरधनीहरुलाई पाँच प्रतिशतका दरले ५० करोड रुपैयाँ नगद लाभांश वितरण गरेको थियो । यो कम्पनीमा लगानी गरेका लगानीकर्ताले उचित प्रतिफल नपाएको अवस्थामा थप हकप्रदको भार बोकाउने प्रस्ताव कम्पनीले गरेको छ ।
हकप्रदमा उचालिने क्रमले दोस्रो बजारमा कम्पनीको शेयर भाउ बढेर कारोबार समेत बढ्न थालेको छ ।
गत आर्थिक वर्षको तेश्रो त्रैमाससम्म कम्पनीले ६२ करोड ५५ लाख रुपैयाँ खुद नाफा गरेको थियो । चैत्रसम्मको विवरण अनुसार एचआईडिसीएलले ९ अर्ब ४८ करोड नगद बैंकमा राखेको छ भने एक अर्ब २७ करोड विद्युत आयोजनाहरुमा लगानी गरेको छ ।
कम्पनीले गत चैत्रसम्म बैंक निक्षेपको ब्याजबाट मात्रै ८८ करोड ९१ लाख रुपैयाँ आम्दानी गरेको थियो । जबकी सो अवधिमा आयोजनामा गरेको लगानीबाट ७ करोड ९० लाख रुपैयाँ ब्याज आम्दानी गरेको उल्लेख गरेको छ ।
कम्पनीको दश करोड कित्ता शेयर नेप्सेमा सुचीकृत छ । कम्पनीले सर्वसाधरणलाई २ करोड कित्ता बिक्री वितरण गरेको थियो।
जलविद्युत आयोजनाहरुमा लगानी गर्ने लक्ष्यका साथ स्थापित कम्पनीमा सञ्चय कोष, राष्ट्रिय बीमा संस्थान, नागरिक लगानी कोष लगायतका सरकारी निकायको ८० प्रतिशत शेयर स्वामित्व रहेको छ । ८ अर्ब संस्थापकको र सर्वसाधारणको २ अर्ब गरी कम्पनीको चुक्ता पूँजी १० अर्ब रुपैयाँ रहेको छ ।
यस कम्पनीलार्इ जलविद्युत आयोजनामा लगानी बढाउने भन्दा बैंकमा बचत गरेर नाफा कमाउने आरोप लाग्दै आएको छ ।