इन्स्योरेन्सले मंगलबार नेपाल स्टक एक्सचेञ्जमा १४ लाख ३ हजार ३२५ कित्ता शेयर सूचीकरण गराएसँगै शेयरधनीहरु शेयर कारोबार गर्न पाइएला कि नपाइला भन्ने अवस्थामा पुगेका छन् ।
संस्थापक र सर्वसाधारणको शेयर अनुपात ५१ अनुपात ४९ कायम गर्नका लागि निष्काशन गरिएको संस्थापक शेयर करोबारमा नआउँदा चलायमान अवस्थाको लगानी स्थिर बन्ने चिन्ता कतिपय लगानीकर्तामा छ ।
अर्कातिर साधारण शेयर सरह हकप्रदमा लगानी गरेका कारण पनि कतिपय लगानीकर्ता शेयर कारोबारमा आउनेमा आशावादी छन् । नियामक निकायको कमजोरीका कारण नै यो अवस्था आएकाले पनि त्यसको सिधा असर लगानीकर्तामा पर्ने भन्दै लगानीकर्ता आशावादी बनेका हुन् ।
एभरेष्ट इन्स्योरेन्सले अरु केही कम्पनीहरुको संस्थापक शेयर दोस्रो बजारमा कारोबार भईरहेको भन्दै लगानीकर्ताको लगानीलाई चलायमान बनाउने पक्षमा रहेको बताएको छ ।
मेरोलगानीसँग कुरा गर्दै इन्स्योरेन्सका प्रमुख कार्यकारी अधिकृत कमल गौतमले भने, ‘दोस्रो बजारमा एभरेष्ट इन्स्योरेन्सको संस्थापक शेयर कारोबार गराउने व्यवस्था मिलाइ दिनका लागि बीमा समितिलाई लिखित आग्रह गरेका छौं । तर जवाफ आएको छैन ।’
बीमा समितिले भने पूँजी योजनाको विषयभन्दा बाहेक कुनै पनि विषयमा कम्पनीबाट पत्रहरु प्राप्त नभएको बताएको छ । मेरोलगानीसँग कुरा गर्दै समितिकी प्रवक्ता पुजन ढुंगेलले कम्पनीका तर्फबाट पूँजी योजनाको विषय पछि कुनै पनि व्यहोराको पत्र प्राप्त नभएको बताइन् ।
यसले कम्पनीको शेयर कारोबारमा आउँछ वा आउँदैन भन्ने प्रश्नलाई जिवितै राखेको छ ।
