बीमा कम्पनीहरुलाई पनि एनएफआरएस लागू गरेकोले वार्षिक साधारण सभा समयमै गर्न नसकेको जानकारी गराउँदै समितिका अध्यक्ष चापाँगाइले भने, ‘चालू आर्थिक वर्ष भित्र सबै बीमा कम्पनीहरुले एनएफआरएस प्रणालीमा वित्तीय विवरण सार्वजनिक गरेर आर्थिक वर्ष २०७४/७५ को साधारण सभा सम्पन्न गर्नेछन् । त्यसपछि बीमा कम्पनीहरुको लागि चुक्ता पूँजी वृद्धि गर्ने बाटो खुल्नेछ।’
त्यसपछि पनि चुक्ता पूँजी कायम नगरे कडा पाईला चाल्ने उनले चेतावनी दिए। एनएफआरएस लागू गर्दा दायित्व परिक्षण गर्नुपर्ने र त्यसको लागि एक्चुरिअल नभएकोले साधारण सभा समयमै गर्न नसकेको उनले जानकारी दिए।
एनएफआरएस प्रणाली लागू गर्दा साधारण सभामा ढिलाई भएको स्वीकर गर्दै उनले भने, ‘ढिलो भयो भन्ने लाग्न सक्छ तर सकारात्मक सुधारको लागि भएको हो। यसलाई सकारात्मक रुपमा नै हेर्न म सबैलाई आग्रह गर्छु ।’
इन्स्योरेन्स कम्पनीलाई एनएफआएस लागु गरेपछि नेपालको इन्स्योरेन्सलाई हेर्ने नजर राष्ट्रिय तथा अन्तराष्ट्रिय स्तरमा एउटै हुने उनको दाबी छ।
यस्तै उनले बीमा क्षेत्रमो दायरा १७ प्रतिशत पुगिसकेको जनाउँदै यो वर्ष भित्रै २० प्रतिशत पुग्ने समेत दाबी गरे। कुल ग्राहस्थ उत्पादनमा पनि बीमा क्षेत्रको योगदान ३ प्रतिशत पुग्न लागेको उनको भनाई छ ।