बैंकको कार्तिक १५ गते सम्पन्न १२ औं वार्षिक साधारण सभाले अनुमोदन गरे बमोजिमको नगद लाभांश नेपाल क्लियरिङ्ग हाउसको कनेक्ट आइपिएस मार्फत सिधै बैंक खातामा पठाउन थालेकाले हितग्राही खातालाई बैंक खातामा बैंक खाता अद्यावधिक नगराएका शेयरधनीहरुलाई अद्यावधिक गराउन सूचित गरेको छ।
त्यसैगरी अझै पनि भौतिक रुपमा शेयर धारण गरिरहेका शेयरधनीहरुलाई समेत शेयर अभौतिकीकरण गराउन आग्रह गरेको छ। शेयर अभौतिकीकरण गरी हितग्राही खातामा बैंक खाता अद्यावधिक गराएपछिमात्र बैंकले नगद लाभांश वितरण गर्ने जनाएको छ।
त्यस्तै धितो बन्धक राखेर ऋण लिएका शेयरधनीहरुको हकमा समेत ऋण लिएको संस्थाबाट नो अव्जेक्सन लेटर प्राप्त भएपछि मात्र नगद लाभांश वितरण गरिने बैंकले जनाएको छ।
बैंकले लाभांश वितरण र साधारणसभा प्रयोजनको लागि कार्तिक १ गते बुकक्लोज गरेको थियो। यसअनुसार असोज ३० गतेसम्म कायम शेयरधनी मात्र लाभांश पाउन योग्य हुनेछन्।
गत आर्थिक वर्ष २०७५/०७६ को मुनाफाबाट वितरण गरिएको १० प्रतिशत बोनस शेयर भने सिडिएस एण्ड क्यिलयरिङ्ग र नेप्सेमा सूचीकृत भएपछि मात्र वितरण हुनेछ।