ग्लोबल आईएमई र जनता बैंकको एकीबृत कारोबार कार्यक्रममा बोल्दै गभर्नर नेपालले बैंक तथा वित्तिय संस्थाहरुले मानव संसाधन व्यवस्थापन सम्बन्धि योजना राष्ट्र बैंकले हेर्नुपर्ने अवस्था आएको बताए।
गभर्नर नेपालले अहिले पनि धेरै बैंकमा दक्ष कर्मचारीको अभाव रहेको बताउँदै बैंकरहरुले कर्मचारीको कार्य क्षमता अभिवृद्धिमा हेलचेक्र्याई गरेको आरोप लगाए। यसलाई राष्ट्र बैंकले निकै संवेदनशिल रुपमा लिएको छ। उनले भने।
मुनाफाको ३ प्रतिशत रकम कर्मचारीको क्षमता बढाउन खर्च गर्नुस् भनेर निर्देशन दिँदा समेत उच्च पदस्थ कर्मचारी मात्र विदेश भ्रमणमा जाने गरेको आरोप लगाउँदै उनले कर्मचारीलाई पनि तालिम दिएर दक्ष बनाउन निर्देशन दिए।
अहिले ठूला बैंकहरुको पनि मुख्य चुनौति भनेको डिजिटलाईजेशन भएको भन्दै उनले प्रविधिक सुरक्षामा खर्च बढाउँदै सेवा प्रवाहलाई चुस्त बनाउन आवश्यक रहेको बताए। पछिल्लो समय साइबर सुरक्षा चुनौति बढिरहेको बताउँदै उनले यसमा लगानी बढाउन बैंकहरुलाई निर्देशन दिए।
बैंकका सञ्चालकहरुले व्यवस्थापनलाई यति मुनाफा गर्नेपर्छ भनेर लक्ष्य दिने गरेको भन्दै उनले गलत प्रेसर नदिन सञ्चालकलाई आग्रह गरे।
राष्ट्र बैंकले कुनै पनि नीति ल्याउनुपूर्व अध्ययन गरेर मात्र ल्याउने बताउँदै उनले बिग मर्जरलाई निरन्तरता दिने उनको भनाई थियो।
