बीमा कम्पनीका सीइओहरु समेत रहेकाे उक्त कार्यक्रममा अध्यक्ष चापागाँइले शाखारहित घुम्ती बीमा सेवा सम्बन्धी मार्गदर्शन जारी भएकाे स्मरण गराउदै घुम्ती बीमा कार्यक्रमलाई प्रभावकारी कार्यन्वयनकाे लागि निर्देशन दिएका हुन् ।
बीमा कम्पनीहरुले चालू आर्थिक वर्षको असार मसान्तसम्म आफ्नो कुल बीमा व्यवसायको १० प्रतिशत लघुबीमा जारी गर्नु पर्ने प्रावधान अनुसार घुम्ती बीमा मार्फत लघुबीमाको लक्ष्य पुरा गर्न सकिने उनको भनाई छ । सरकारको नीतिअनुसार घुम्ती बीमाले लघु बीमाको लक्ष्य पुरा गर्न सहयोग पुग्ने उनको दाबी छ ।
‘घुम्ती बीमा मार्फत प्रत्येक एक स्थानीय तहमा महिनामा एक पटक पुग्नु पर्छ भन्ने हामीले निर्देशन दिईसकेका छौं’ उनले भने, ‘रिपोर्टिगको व्यवस्था गरेको छौं घुम्ती बीमा मार्फत कति बीमालेख बिक्री भयो भन्ने तथ्यांक समेत हामी संकलन गर्छौ ।’
सबै स्थानीय तहमा बीमा कम्पनी पुग्न कठिनाई भएपनि घुम्ती बीमा मार्फत बीमा क्षेत्रको विस्तार गरिने उनको भनाई छ ।
यस्तै बीमा समितिको प्रबर्द्धन र मिडिया इन्टरनेशनलको प्रस्तुतिमा बीमा सम्बन्धी जनचेतनामूलक नयाँ गीत सार्वजनिक गरिएको छ ।
