एडीबी का अनुसार सन् २०२० मा विकासशील अर्थव्यवस्थाको कुल गाहस्थ्य उत्पादन (जीडीपी) ०.७ प्रतिशतले खुम्चने छ ।
यद्यपी सन् २०२१ मा यस क्षेत्रमा ६.८ प्रतिशतको वृद्धि हासिल हुनेछ । एडीबीका अनुसार,यदि कोरोना भाइरसको स्थित अझैँ खराब भयो भने यस क्षेत्रको अर्थव्यवस्थाको गिरावट पनि बढ्न सक्छ ।
यो संकुचन सन् १९६२ यताकै पहिलो हुने एडीबीका प्रमुख अर्थशास्त्री यासुयुकी सावडाले बताए । उनले भने, यो हाम्रो क्षेत्रका लाखौँ मानिसहरुलाई गरिबीबाट निकाल्ने प्रयासका लागि एउटा ठूलो झट्का हो ।
यस वर्ष एशिया क्षेत्रका तीन चौथाई अर्थतन्त्र खुम्चने क्रममा रहेको उनले बताए । यद्यपि, यो प्रवृत्तिलाई पाखा लगाएर चिनियाँ अर्थतन्त्र यस वर्ष १.८ प्रतिशतले विस्तार हुने बैंकको प्रक्षेपण छ ।
यस अघि जुन महिनामा गरिएको प्रक्षेपणमा भने अर्थतन्त्र ०.१ प्रतिशतले बढ्ने बताइएको थियो । एजेन्सी
