बैशाखमा हुने विवाहका लागि अहिलेदेखि नै सुनको जोहो गर्न थालेका कारण केही समयदेखि सुन सान देखिएको सुन पसलहरुमा एकाएक ‘भीड’ लाग्न थालेको छ ।
‘लभ’ म्यारिज गर्ने र मागी विवाह गर्नेले विवाह पञ्चमीको अवसर छोपेर गरेपनि अन्यले भने लगन नभएका कारण पुसदेखि विवाह गर्न पाएका छैनन् । बिवाहको लगन नभएको चार महिना भएको छ । यति लामो समयपछि विवाहको सिजन बैशाखमा आउँदै छ ।
लामो समयपछि आउन लागेको विवाहको सिजन अघि नै सुन खरिद गर्नेको पसलमा भीडभाड लाग्न थालेको छ । विवाहको लगन नभएकाले सुनसान बनेका सुन पसलहरुमा यति बेला भीडभाड देखिन थालेको छ ।
यता, सुन व्यवसायीलाई बैशाखमा हुने विवाहका लागि सुन बिक्री गर्न भ्याइनभ्याइ छ । बैशाखमा हुने विवाहका लागि सुन खरिद गर्नेको चाप बढेको सुन व्यवसायी मणिरत्न शाक्यले बताए ।
‘विवाहको सिजन नभएका कारण विगत चार महिनादेखि सुन बिक्री गर्न पाएका थिएनौं,’ उनले भने, ‘बैंशाखमा आउने विवाहको लागि सुन अहिलेदेखि खरिद गर्न थालेका कारण सुनको बिक्री बढेको छ ।’
सुनको मूल्य निरन्तर ओरालो लाग्दै आएको छ । सात महिनाअघि एकतोला सुन खरिद गर्न १ लाख ३ हजार ५ सय रुपैयाँ पर्ने गर्दथ्यो । तर अहिले ८७ हजार ५ सय रुपैयाँ आएको छ ।
फेरि सुनको भाउ महंगो हुने भएकाले पनि यति बेला खरिद गरेर बैशाखमा हुने विवाहका लागि जोहो गरिदै छ ।
विवाहको लगन नभएका बेला निरास बनेका सुन व्यवसायीहरुमा यतिबेला उत्साह छाएको छ । पुसदेखि निरास बनेका व्यवसायीहरु बिवाह पञ्चमी आउनु अघिका दिनमा उत्साह छाएपनि त्यसपछि भने निरास बनेका थिए । अब फेरि विवाहको आशा पलाएको व्यवसायीहरु बताउँछन् ।
गत पुसदेखि नै लगन नभएका कारण व्यापारमा कुनै उत्साह नभएको सुन व्यवसायी शाक्यले बताए । फागुनको सुरुवातसँगै सुन बजारमा व्यापार फस्टाउने आशा जागेको उनको भनाइ छ ।
‘अहिले व्यापार राम्रो हुँदै गएको छ,’ शाक्यले भने, ‘व्यापार हुने समयमा सुनको अभाव हुन थालेको छ ।’
सरकारले सुन आयातमा कटौती गर्दै दैनिक १० किलो मात्र ल्याउन स्वीकृत दिने गरेको छ । लकडाउन अघि दैनिक २० किलो सुन आयात हुँदै आएको थियो । त्यसबाहेक चाडपर्व र लगनको समयमा दैनिक २५ किलोसम्म सुन आयात गर्न स्वीकृत दिने गरिएको थियो । तर अहिले दैनिक १० किलो मात्र आयात भएकाले पनि अभाव हुन गएको हो ।
यता, बजारमा सुनको माग दैनिक २५ देखि ३० किलोसम्म हुँदै आएको छ । माग र आपूर्तिबीच सन्तुलन नमिल्दा सुनको अभाव हुन गएको हो । सुन चाँदी व्यवसायी महासंघले सुनको कोटा बढाउन सरकारसँग माग गर्दै आएको छ । तर सरकारले सुनको कोटा बढाउने बिषयमा कुनै निणर्य गरिसकेको छैन् ।
कोरोना भाइरसका कारण सुनको मूल्यमा उच्च रुपमा बढेर तोलाको १ लाख माथि पुगेपछि सुन खरिद गर्नेहरुमा कमी आएको थियो । तर अहिले सुनको मूल्य घटेको छ । तर बजारमा सुन भने अभाव हुँदै गएको छ ।
केही सयमअघि सुनको मूल्यले नयाँ रेकर्ड बनाउँदै अगाडि बढेको थियो । गत साउन २३ गते सुनको मूल्यले नयाँ उचाइ छोएको थियो । उक्त दिन एक तोला सुन खरिद गर्नका लागि १ लाख ३ हजार ५ सय रुपैयाँ तिर्नु परेको थियो ।
तर अहिले (बुधबार) एक तोला सुन किन्दा ८७ हजार ५ सय तिरे मात्र पुग्छ । करिव सात महिनाको अबधिमा सुन तोलामा १६ हजार रुपैयाँ घटेको छ ।
सुन सस्तो भएपछि बजारमा सुनको अभाव देखिन थालेको छ । व्यवसायीले पनि सुनको अभाव देखाउन थालेका छन् ।
सुन सस्तो हुँदा उपभोक्तालाई भने फाइदा भएको छ । उपभोक्ताले सस्तो मूल्यमा सुन खरिद गर्न पाएका छन् ।
सुन आयात गर्दै आएको नेपाल बैंकर्स संघसँग पनि स्टकमा सुन नभएको प्रतिक्रिया दिएको छ । यो साता १०० किलो सुन आउने संघको भनाइ छ ।
कोरोना भाइरसका कारण २०७७ साल सुन व्यवसायीका लागि खुशीको वर्ष बन्न सकेन् । तर, नयाँ बर्ष २०७८ भने सुन चाँदी व्यवसायीहरुलाई खुशीको वर्ष हुने अनुमान गरेका छन् ।
