नयाँ संक्रमित वृद्धिकाे गतिलाई मध्यनजर गर्दै पाकिस्तान लगायतका ३७ देशहरुमा कोरोनाको तेश्रो र चौथो लहरको त्रासले सताउन लागेको छ । जसमध्ये अमेरिका, ब्राजिल, बेलायत, फ्रान्स, जर्मनी, पोल्याण्ड, इटली, यूक्रेन, स्पेन लगायतका राष्ट्रहरु छन् । यीमध्ये कैयौं देशहरुले कोरोनाको दोश्रो र केहिहरुले तेश्रो लहरकाे सामना गरिरहेका छन् ।
अमेरिकाको फ्लोरिडामा युवाहरुमा तिव्र रूपमा फैलिदैँछ कोभिड १९
अमेरिकाको फ्लोरिडा राज्यमा कोभिड १९ भाइरस फेरि तिव्रताकासाथ फैलिरहेको छ । यसपटक भाइरसको असर सबैभन्दा बढि यु्वाहरुमा देखिइरहेको छ । न्यूयोर्क टाइम्सको रिपोर्टका अनुसार हरेक दिन पाँच हजार भन्दा धेरै संक्रमितहरु थपिएका छन् । यस अनुसार संक्रमितमा ८ प्रतिशतको बढोत्तरी देखिएको छ । यी संक्रमितमध्ये ८० देखि ९० प्रतिशत मानिसहरुको उमेर ४० वर्षभन्दा कम रहेको छ ।
ब्राजिलमा आईसीयूको बेडमा कमी हुँदा कुर्चीमा हुँदैछ उपचार
अमेरिका पछि विश्वकै सबैभन्दा संक्रमित देश ब्राजिलको अवस्था नियन्त्रणभन्दा पर गइरहेको छ । यस देशमा हालसम्म एक करोड २४ लाख भन्दा धेरै नयाँ कोरोना संक्रमित थपिइसकेका छन् भने तीन लाख १० हजार भन्दा धेरै संक्रमितहरुले ज्यान गुमाइसकेका छन् ।
ब्राजिलमा हाल विश्वकै सबैभन्दा धेरै नयाँ संक्रमण भेटिरहेको छ र ज्यान गुमाउनेको संख्या पनि धेरै नै छ । यस्तो अवस्थामा कैयन् अस्पतालमा नयाँ संकट उत्पन्न भइरहेको छ । देशको राजधानी ब्राजिलीयासमेत गरी २६मध्ये १६ राज्यमा आईसीयू बेडको कमी भइरहेको छ । ९० प्रतिशतसम्म सबै बेडहरुमा संक्रमित भरिएका छन् । रियो ग्राण्ड डो सुल राज्यको आईसीयू केयर यूनिटकालागि दुई सातादेखि प्रतिक्षामा हुने बिरामीहरुको संख्या दोब्बर भइसकेको छ । रेष्टिंगा अस्पतालको इमरजेन्सी रुम कोभिड वार्ड बनिसकेको छ । कैयन् बिरामीहरु बेडको कमीका कराण कुर्चीमा नै बसेर उपचार गर्न बाध्य भएका छन् । संक्रमितहरु अत्यन्त गम्भिर लक्षण र अक्सिजनको स्तर अत्यन्त कम भई आइरहेको अस्पतालका निर्देशक पाउलो फर्नांडो बताउँछन् । दक्षिण ब्राजिलको सबैभन्दा समृद्ध शहर पोर्टो एलेग्रीको अस्पतालमा पहिलेभन्दा धेरै युवा संक्रमितहरु आइरहेका छन् । यस्तै हरेक घण्टा १२५ जना संक्रमितहरुको ज्यान गइरहेको छ र चिहानमा शवहरुको लाइन लागेको छ ।
पाकिस्तानले तेश्रो लहर रोक्नका लागि प्रतिबन्ध लगायो
पाकिस्तानमा फेरि एक पटक कोरोना संक्रमितको संख्या बढिरहेको छ । पाकिस्तानी सरकारले कोरोनाको तेश्रो लहरको खतरा बढ्ने चिन्ताका कारण प्रतिबन्ध लगाउन सुरु गरेको छ ।पाकिस्तानका ८ प्रतिशतभन्दा धेरै पोजिटिभ दर हुने शहरहरुमा वैवाहिक समारोह तथा अन्य कार्यक्रममा धेरै भिडभाड गर्न नपाइने नियम लागु गरिएको छ ।
पाकिस्तानमा हाल हरेक दिन चार हजार भन्दा धेरै संक्रमित भेटिएका छन् भने १०० देखि १५० संक्रमितहरुको ज्यान गएको छ ।
विश्वभरमा हालसम्म १२ करोड ७७ लाख भन्दा धेरै मानिस कोरोना संक्रमणको चपेटामा परेका छन् । तीनमा १० करोड २९ लाख भन्दा धेरै मानिस निको भएका छन् । यसैगरी विश्वमा संक्रमणका कारण ज्यान गुमाउनेको संख्या २७ करोड ९५ लाख भन्दा बढि रहेको छ ।
भारतमा लगातार तेश्रो दिन ६८ हजार नयाँ संक्रमित भेटिए
भारतमा कोरोना महामारीको दोश्रो लहर तिव्र रुपमा फैलिरहेको छ । पछिल्लो २४ घण्टामा सबैभन्दा नयाँ केसहरु भारतमा भेटिएका छन् । पछिल्लो तीन दिनदेखि लगातार यस देशमा ६८ हजार भन्दा धेरै मानिसमा संक्रमण थपिएको छ । भारतमा हालसम्म एक करोड २० लाख जना कोरोना संक्रमित भइसकेका छन् । जसमध्ये एक करोड १३ लाख भन्दा धेरै निको भएका छन् र एक लाख ६१ हजारको हाराहारी संक्रमितको ज्यान गइसकेको छ ।
नेपालमा दैनिक १०० देखि १५० काे हाराहारीमा संक्रमित थपिइरहेका छन् । सोमबार तीन हजार १२२ पीसीआर परीक्षण भएकोमा १४१ जनामा कोरोना पुष्टि भएको छ । विगत २४ घण्टामा कुनै संक्रमितको ज्यान गएको छैन । तर यस अवधिमा ८२ जना निको भएका छन् ।
( एजेन्सीकाे सहयाेगमा । )
