यस साताको दुई कारोबार दिनमा नेप्से सूचक ७३.४७ अंकले ओरालो लागेको हो । अघिल्लो ४ कारोबार दिन दैनिक नयाँ रेकर्ड बनाउदै उकालो लागेको नेप्से सूचक दुई कारोबार दिनमै ह्वातै झरेको छ । लगानीकर्ताहरुले प्रोफिट बुक गर्दा यस दिन पनि नेप्सेमा करेक्सन देखिएको हो ।
सोमबार नेप्से सूचक १.३९ प्रतिशत अर्थात ३७.५८ अंकले घटेर २६६१.९३ विन्दुमा झरेको छ । यस दिन कारोबारमा आएका २१३ कम्पनीका १ करोड ४२ लाख ७६८ कित्ता शेयर किनबेच भएर ६ अर्ब ७६ करोड ६८ लाख रुपैयाँ बराबरको कारोबार भएको छ ।
सोमबार नेप्से सूचकसंगै कारोबार रकम पनि घटेको छ । आइतबारको तुलनामा कारोबार रकम २ अर्ब ३ करोड ५० लाख रुपैयाँले घटेको हो । आइतबार ८ अर्ब ८० करोड १८ लाख रुपैयाँ बराबरको शेयर कारोबार भएको थियो ।
साेमवार करेक्सन देखिएपनि २ कम्पनीको शेयर भने सकारात्मक सर्किट लेभलमा कारोबार भएको छ । सोमबार ज्योति लाइफ इन्स्योरेन्स र महिला लघुवित्त वित्तीय संस्थाको शेयर सकारात्मक सर्किट लेभलमा कारोबार भएको हो ।
यता आजै तेस्रो त्रैमासिक वित्तीय विवरण सर्वजनिक गरेको चन्द्रगिरी हिल्सको शेयरमूल्य भने नकारात्मक सर्किट लेभलमा कारोबार भएको छ । कम्पनीको सञ्चालक आम्दानीसंगै घाटा बढेपछि शेयरमूल्य ९.८० प्रतिशतले घटेको हो । यस्तै सप्तकोशी डेभलपमेन्ट बैंक,आईएमई जनरल रिडी हाइड्रोपावर लगायतको शेयरमूल्य ओरालो लागेका छन् ।
सोमबार कारोबारमा आएका १३ उपसमूहमध्ये ११ उपसमूहको परिसूचक घटेको छ भने फाइनान्स र हाइड्रोपावर उपसमूहको परिसूचक बढेको छ । यस दिन फाइनान्स उपसमूहको परिसूचक ०.४८ प्रतिशत र हाइड्रोपावर उपसमूहको परिसूचक ०.१२ प्रतिशतले बढेको हो । होटल तथा पर्यटन उपसमूहको परिसूचक सर्वाधिक ६.१७ प्रतिशत घटेको छ । त्यसैगरी, व्यापार उपसमूहको परिसूचक २.९ प्रतिशतभन्दा बढी घटेको छ भने बैंकिङ्ग, विकास बैंक, निर्जीवन बीमा,माइक्रोफाइनान्स र अन्य उपसमूहको परिसूचक १ प्रतिशतभन्दा बढी घटेको छ ।
कारोबार रकमका आधारमा यस दिन नागरिक लगानी कोष शीर्ष स्थानमा रहेको छ । यस दिन कोषको २८ करोड ३४ लाख ४७ हजार रुपैयाँ बराबरको शेयर खरिदबिक्री भएको छ । त्यसैगरी, यस दिन एचआईडिसीएल, निफ्रा, एनआईसी एशिया लघुवित्त, अपर तामाकोशी र चन्द्रागिरी हिल्सको शेयर २० करोड भन्दा बढीको शेयर कारोबार भएको छ ।