साउनदेखि एकीकृत कारोबार गर्न आधा दर्जन कम्पनीलाई चटारो, हिमालयन र इन्भेष्टमेन्ट बैंकलाई भने अझै चार महिना लाग्ने

Jun 15, 2021 04:05 PM merolagani

असारमा किसानलाई धान रोपाइँ गर्न हतार भएजस्तै करिव आधा दर्जन बैंक तथा वित्तीय संस्था एक आपसमा गाभिएर नयाँ आर्थिक वर्ष साउनदेखि एकीकृत कारोबार गर्ने चटारोमा छन् । तर, करिव एक महिना अघि मर्जरमा जाने सम्झौता गरेका हिमालयन र इन्भेष्टमेन्ट बैंकले भने साउनदेखि एकीकृत कारोबार गर्न नभ्याउने भएका छन् । ती बैंकको एकीकृत कारोबार गर्न अझै कम्तिमा चार महिना लाग्ने भएको छ ।

कोरोना भाइरसका कारण मर्जरको काम दु्रर्त गतिमा गर्न नसकिएको नेपाल इन्भेष्टमेन्ट बैंकका अध्यक्ष पृथ्वीबहादुर पाण्डेले बताए । ‘अहिले कोरोना भाइरसका कारण डीडीए लगायतको काम केही ढिलो हुन गएको छ,’ उनले भने, ‘सबै काम सकाउनका लागि समय लाग्ने भएकाले एकीकृत कारोबार गर्न अझै केही महिना लाग्ने सम्भावना देखिएको छ ।’

एकीकृत सम्पत्ती र दायित्वको मूल्यांकन (डीडीए) गर्ने काम सकाउन र कर्मचारी व्यवस्थापन लगायतका काम अझै सकाउन समय लाग्ने भएकाले सम्भवत दशैंअघि दुई बैंकको एकीकृत कारोबार हुने सम्भावना नदेखिएको हिमालयन बैंकका एक कर्मचारीले बताए ।

हिमालयन र इन्भेष्टमेन्ट बैंकको मर्जर प्रक्रियाले अन्तिम रुप लिन अझै लामो समय लाग्ने भएपनि नयाँ आर्थिक वर्षसँगै एकीकृत कारोबार गर्ने उद्देश्यले आर्थिक वर्षको अन्त्यमा मर्जरमा जानेको लहर नै चल्न थालेको छ । वर्षैभरि (झन्डै ११ महिना) सुस्त रहेको मर्जर अचानक आर्थिक वर्षको अन्तिम महिना ह्वात्तै बढ्ने गर्छ ।

नेपाल राष्ट्र बैंकको तथ्यांक अनुसार वर्षको ११ महिनामा एक्विजिसन र मर्जरमा जाने न्यून हुन्छन् । तर असारमा ह्वात्तै बढ्ने गरेको विगतको तथ्यांकले देखाउँछ ।

केन्द्रीय बैंकले केही वर्षअघिको आर्थिक वर्षको मौद्रिक नीतिमा बैंकहरुको चुक्त पुँजी तीनदेखि चार गुणासम्म बढाउने प्रस्ताव ल्याएपछि त झन् आर्थिक वर्षको अन्तिम महिनामा वित्तीय संस्थाको निद्रा खुलेझैं छिटोछिटो मर्जर गर्ने प्रवृत्तिले बढेको हो ।

चालु आर्थिक वर्ष समाप्त हुन एक महिना बाँकी हुँदा करिव आधा दर्जन बैंक तथा वित्तीय संस्था गाभिँदै छन् । हालै मात्र सिटिजन्स बैंकले सिर्जना फाइनान्सलाई गाभ्ने प्रस्ताव बिशेष साधारणसभाले गरेको छ । यसैगरी, असार महिनामा नै गाभ्ने गरी नेपाल फाइनान्सले ललितपुर फाइनान्सलाई गाभ्ने भएको छ ।

साथै, नबिल बैंकले युनाइटेड फाइनान्सलाई यही महिना भित्रै गाभ्ने र नयाँ आर्थिक वर्षदेखि एकिकृत कारोबार गराउने तयारीमा रहेको छ । यसैगरी, केही लघुवित्त पनि यही महिनाभित्र मर्जरको प्रक्रिया सकाउने र नयाँ आर्थिक वर्षदेखि एकीकृत कारोबार गर्ने तयारीमा रहेका छन् ।

चालु आर्थिक वर्षभित्रै मर्जरमा जाँदा नयाँ आर्थिक वर्षदेखि छुट्टाछुट्टै वित्तीय विवरण प्रस्तुत गर्नु नपर्ने भएकाले पनि मर्जरमा जान हतारिनु परेको एक बैंकका प्रमुख कार्यकारी अधिकृतले बताए । ‘वित्तीय विवरण छुट्टै बनाउने झन्झटबाट मुक्त हुन पनि आर्थिक वर्षको अन्त्यमा मर्जरमा जानेको संख्या बढ्ने गरेको हो,’ उनले भने ।

राष्ट्र बैंकले बैंक तथा वित्तीय संस्थाको संख्या घटाउने उद्देश्यले मर्जर प्रस्ताव ल्याएको र त्यही प्रस्तावलाई पालना गर्दै मर्जर र एक्विजिसनमा जान लागेका हुन् ।

राष्ट्र बैंकका अनुसार, गत बैंशाखसम्ममा २७ वाणिज्य बैंक, १८ विकास बैंक, २० वित्त कम्पनी, ७२ लघुवित्त संस्था र एउटा इन्फास्टक्चर बैंक छन् । ती संस्थालाई घटाएर साढे दुई दर्जनमा झार्ने रणनीतिमा केन्द्रीय बैंक लागि परेको छ ।

केन्द्रीय बैंकले ल्याएको मौद्रिक नीति कार्यान्वयन हुने हो भने २ वर्षभित्र करिब १५ वाणिज्य बैंक, ८ देखि १० वटामात्र विकास बैंक र करिब ५ वटामात्रै फाइनान्स कम्पनी रहने बैंकरको भनाइ छ । राष्ट्र बैंकले पनि हाल भइरहेका बैंक, वित्तीय संस्था घटाएर ३० वटामा सीमित राख्न चाहेको एक बैंकरले बताए ।

अन्य वित्तीय संस्था भन्दा पनि वाणिज्य बैंकको संख्यालाई घटाउन चाहिरहेको नेपाल राष्ट्र बैंकका पूर्व कार्यकारी निर्देशक भाष्करमणि ज्ञवालीले बताए ।

‘वाणिज्य बैंक बाहेक धेरैजसो वित्तीय संस्था मर्जर र एक्विजिसनमा गइसकेकाले पनि अबको केन्द्रीय बैंकको ध्यान वाणिज्य बैंकको संख्या घटाउनेमा छ’, उनले भने, ‘वाणिज्य बैंक करिव एक दर्जन मात्र भए पुग्ने निष्कर्षमा राष्ट्र बैंक पुगेको देखिन्छ ।’

comments powered by Disqus

लघुवित्त वित्तीय संस्थाको लाभांशमा कडाई, राष्ट्र बैंकले दियो यस्तो निर्देशन

Jul 26, 2021 06:33 PM

नेपाल राष्ट्र बैंकले लघुवित्त वित्तीय वित्तीय संस्थाहरुलाई लाभांश वितरणमा कडाई गरेको छ । बैंकले सोमबार लघुवित्त वित्तीय संस्थाहरुलाई एकीकृत निर्देशन जारी गर्दै लाभांश वितरणमा नियन्त्रण गरेको हो ।