पुरानो झन्झटिलो सिस्टमलाई प्रतिस्थापन गरी फरक सेवा र दैनिक १५ हजार आवेदन क्षमता थेग्न सक्ने अनलाइन सवारीचालक अनुमति पत्र सार्वजनिक गर्ने भएको हो ।
काठमाडौं तथा देशैभरका यातायात कार्यालयहरुले अगामी बैशाख मसान्तसम्म सबै पेन्डिङ आवेदकको परीक्षा लिने गरी ट्रायल परीक्षा लिइरहेका छन् । बैशाख भित्र बायोमेट्रिकको लागि यातायात कार्यालय नजाने आवेदकको आवेदन समेत स्वत खारेज गरेर नयाँ प्रणाली मार्फत सेवा दिने भएको छ ।
नयाँ सिस्टम सहित विभागले जेठ १० देखि अनलाइन सवारी अनुमति पत्र लाइसेन्स आवेदन समेत खुलाउन अन्तिम तयारी गरेको छ ।
‘यातायात कार्यालयहरुले बैशाख अन्तिमसम्म सबै आवेदकको परीक्षा लिइसक्ने भनेका छन्, यदि बैशाखसम्म परीक्षा दिन छुटेकाहरुको आवेदकको लाइसेन्स आवेदन खारेज गरेर अघि बढ्ने तयारी छ,’ यातायात विभागका इन्जिनियर सन्तोष पोखरेलले भने ।
अब सेवाग्राहीले राजश्व अनलाइन मार्फत भुक्तानी गरेपछि मात्रै यातायात कार्यालय पुग्नुपर्ने गरी सिस्टम डिजाइन गरिएको छ । पोखरेलका अनुसार सिस्टममा आवेदक धेरै मान्छे देखियो तर, यातायात कार्यालय तथा फिल्डमा भने खास सेवाग्राही नै छैनन् ।
त्यसैगरी, आवेदकले दिएको आवेदनमा कुनै क्रुटि भएमा सेवाग्राही आफैले लगइन गरेर आफनो डेटा सच्याउन पाउने छन् ।
कस्तो हुन्छ सिस्टम ?
जेठ १० गेत सार्वजनिक हुने अनलाइन लाइसेन्स आवेदन सिस्टममा मोबाइल नम्बर तथा लाइसेन्स नम्बरबाट लगइन गर्न सकिन्छ । लगइन भइसकेपछि ड्यासबोडमा जान्छ र सेवाग्राहीले संघियता अनुसार आफ्नो व्यक्तिगत विवरण भर्नुपर्नेछ ।
नागरिकता तथा डक्युमेन्ट समेत सिस्टममै अपलोड गर्न सकिनेछ । यदि गृहमन्त्रालयमा भएको नागरिकता अनुसार डेटा नभएको खण्डमा यातायात कार्यालयनमा गएर नाम रुजु गराउन पर्छ । नाम तथा आफ्नो व्यक्तिगत विवरण सच्याउनै कै लागि कार्यालय पुग्नुपर्ने र राजश्व तिर्न लाइन लाग्नुपर्ने बाध्यता हट्ने इन्जिनियर पोखरेलको दाबी छ ।
सेवाग्राहीले जुन यातायात कार्यालयबाट आवेदन दियो सोहि कार्यालयमै अनलाइन मार्फत भुक्तानी गरेर परिक्षा दिन पाउने छन् । यो पहलले यातायात विचौलिया हट्ने विभागको अनुमान छ ।
‘पहिलो चरणमा नयाँ साइट सार्वजनिक गराएर सेवा सुचारु गर्ने र दोस्रो चरणमा लाइसेन्स नविकरण, ट्रायल पास गरिसकेपछिको राजस्व भुक्तानी समेत अनलाइनबाटै पेमेन्ट गर्न सकिने सुविधा ल्याउदैछौं,’ इन्जिनियर पोखरेलले मेरोलगानीसँग भने ।
विभागले केहि दिनमै इडिएल सिस्टमसँग नयाँ प्रणालीलाई कनेक्ट गराएर सेवा सुरु गर्ने तयारी छ । इन्जिनियर पोखरेलले ४ गते भित्र नयाँ अनलाइन प्रणाली टेस्टिङ गरिसकेर १० गतेबाट पूर्णरुपमा सुरु गर्ने निर्णय भएको छ ।
विभागले बैशाखभित्र लाइसेन्स परीक्षा दिन छुटेकाको आवेदन क्यान्सील गराएर नयाँ लाइसेन्स फारम भनुपर्ने गरि सूचना नै निकाल्ने तयारी गरेको छ ।