कम्पनीको पूँजी वृद्धि गर्ने सम्बन्धमा बीमा समितिबाट भएको निर्देशन बमोजिम जेठ २५ गते सम्पन्न भएको चौथो वार्षिक साधारण सभाले हाल कायम रहेको संस्थापक सेयरधनीहरूबाट १ बराबर १ का दरले थप लगानी गर्ने निर्णय गरेको थियो ।
कम्पनीको उक्त निर्णयलाई बीमा समितिले स्वीकृत गरेसँगै कम्पनीले संस्थापक सेयरधनीहरूलाई आफ्नो नाममा हाल कायम कुल शेयर बराबरको थप रकम लगानी गर्न आग्रह गरेको हो ।
कम्पनीको संस्थापक सेयरधनीहरूले भदौं ६ गतेभित्र रकम जम्मा गरिसक्नु पर्ने छ ।
संस्थापक शेयरधनीहरुले ग्लोबल आइएमई बैंक, कान्तिपथ, कुमारी बैंक, पुतलीसडक, सिद्धार्थ बैंक न्यूरोड र नेपाल इन्भेष्टमेन्ट बैंक, कालिमाटीमा रहेको बैंक खातामा रकम जम्मा गर्नुपर्ने कम्पनीले जनाएको छ ।
कम्पनीको हाल चुक्ता पूँजी १ अर्ब ४० करोड रुपैयाँ रहेको छ । संस्थापकहरुले थप शत प्रतिशत पूँजी थपेपछि कम्पनीको चुक्ता पूँजी २ अर्ब ८० करोड रुपैयाँ पुग्नेछ । त्यसपछि कायम चुक्ता पूँजीकाे ४० प्रतिशत १ अर्ब २० कराेड रूपैयाँ बराबरकाे आईपीओ निष्काशन पश्चात कम्पनीको चुक्ता पूँजी ४ अर्ब रुपैयाँ पुग्नेछ ।
त्यसपछि कम्पनीले हकप्रद वा बाेनस शेयर वितरण गरेर बीमा समितिको निर्देशन अनुसार चुक्ता पूँजी ५ अर्ब रुपैयाँ पुर्याउने तयारी गरेकाे हाे ।