प्राधिकरणले तयार पारेको ०७८ मंसिरदेखि गत मंसिरसम्मको रिपोर्टमा नेपालको इन्टरनेट उद्योगमा पछि प्रवेश गरेका कम्पनीले आक्रमक सेवा विस्तार गरिरहेका छन् ।
तर, टेलिकमले प्रमुख आम्दानीको स्रोतको रुपमा अघि बढाएको एफटीटीएच सेवा पछिल्लो समय खस्किदै गएको छ । मंसिरसम्म नेपाल टेलिकमको फाइबर इन्टरनेट सेवा लिने दुई लाख ८९ हजार पुगेका छन । जबकी गत बर्ष नै यो संख्या तीन लाख माथि थियो ।
०७८ मंसिरसम्म टेलिकमका एफटीटीएच ग्राहक तीन लाख ९ हजार ४५५ जना पुगेका थिए । हाल टेलिकम नेतृत्व एफटीटीएच सेवा विस्तारमा चुक्दै गएको छ ।
गत एक बर्ष अघि मात्रै इन्टरनेट बजारमा प्रवेश गरेको आईएमई समुह अन्तर्गतको डिसहोम नेट दुई लाखको क्लबमा पुग्न थालेको छ ।
गत बर्षसम्म डिसहोम नेटका ग्राहक ४४ हजार थिए । तर, अहिले आक्रमक सेवा विस्तार र अन्य सेवाप्रदायकको भन्दा कम मूल्यमा इन्टरनेट प्याकेज उपलब्ध गराउँदै एक लाख ९५ हजार जना नयाँ प्रयोगकर्ता पुर्याइसकेको छ ।
सरकारी स्वामित्वको नेपाल टेलिकमका भने दिन प्रतिदिन प्रयोगकर्ता नयाँ इन्टरनेट कम्पनीमा सिफ्ट हुँदै गएका छन । ‘एफटीटीएच लगायतका सेवामा एमडीले कुनै चासो नै दिनुभएको छैन’ ती अधिकारीले भने ‘नयाँ बिस्तार गर्न त सकेनौं भएका ग्राहकलाई पनि रोक्न सक्ने अवस्था छैन ।’
टेलिकमको एफटीटीएच गुणस्तरीय भएपनि मेन्टिनेन्सको प्रक्रिया झन्झटिलो र कम्पनीबाट तत्काल कुनै ‘रेस्पोन्स’ नआउने गुनासो बढ्दै गएका छन । टेलिकमको एफटीटीएच प्रयोगकर्ता घटेको तथ्याङ्कले पनि टेलिकम नेतृत्व सेवा विस्तारमा गम्भिर नभएको प्रष्ट देखाउछ ।
यस अघिका पूर्व प्रबन्ध निर्देशक डिल्लीराम अधिकारीले टेलिकमको एफटीटीएचलाई ‘गेमचेन्जर प्रोजेक्ट’ को रुपमा अघि बढाएका थिए । उनको कार्यकालमा टेलिकमको फाइबर इन्टरनेट दैनिक हजारौंको संख्यामा वितरण हुने गरेको थियो ।
तर, अहिलेका प्रबन्ध निर्देशक पौडेल आएपछि यो संख्या शुन्यमै झरेको टेलिकम भित्रैका कर्मचारी बताउछन ।
सञ्चार मन्त्रालयले गरेको चालु आर्थिक बर्षको गत पुसमसान्तसम्म टेलिकमको कार्यसम्पादन मुल्याङ्कनमा समेत कमजोर औल्याएको छ । उक्त मुल्याङ्कमा चालू आर्थिक बर्षको तुलनामा अघिल्लो आव एफटीटीएच बितरण बढी भएको र यो बर्ष निकै कम भएको उल्लेख छ ।
टेलिकम बाहेक अन्य निजी क्षेत्रका इन्टरनेट सेवाप्रदायकले बर्ष दिनमै दुई लाख बढी प्रयोगकर्ता बढाएको तथ्याङ्कले देखाएको छ । जसमा वल्र्डलिंङक, डिसहोम, क्लासिकटेक लगायतका कम्पनीले आक्रामक बजार विस्तार गरिरहेका छन् ।