एफपीओ र मर्जरको पर्चेज गेनमा सरकारले कर तिर्नुपर्ने नीति ल्याएपछि त्यसको विरुद्ध मुद्दामा मामिलामा लागेका कारण अन्य बैंकहरुको लाभांश घोषणामा ढिलाई भएको बताइएको छ । अन्य बैंकहरुको रिपोर्ट राष्ट्र बैंकमा रहेको र त्यहाँबाट स्वीकृत हुनासाथ लाभांश धमाधम घोषणा गर्ने तयारीमा छन् ।
अब अन्य बैकहरुले लाभांश घोषणा गरेर साधारण सभा आह्वान गरे पनि दशैं पछि मात्रै लाभांश लगानीकर्ताको हातमा पर्नेछ । कम्पनी ऐन अनुसार साधारण सभा हुने दिन भन्दा २१ दिन अगाडि नै राष्ट्रियस्तरका समाचारपत्रमा सूचना प्रकाशन गरेर सूचना दिनुपर्छ । असोज १२ गतेसम्म ५ वटा मात्रै वाणिज्य बैकले साधारण सभा आह्वानको सूचना प्रकाशन गरेकाले तिनीहरुले मात्रै दशैं अगाडि लगानीकर्ताको खातामा लाभांश डिपोजिट गर्न सक्ने स्थिति बनेको छ ।
गत वर्ष लगानीकर्ताको हात खाली बनाएको माछापुच्छ्रे बैंकले यसपटक लगानीकर्तालाई सबैभन्दा अगाडि लाभांश घोषणा गरेर साधारण सभाको लागि बुक क्लोज समेत गरिसकेको छ । बैंकले १३.३ प्रतिशत बोनस शेयर र शुन्य दशमलब ७ प्रतिशत नगद लाभांश गरेर कुल १४ प्रतिशत लाभांश प्राप्त गरेका थिए । कर प्रयोजनको लागि बैंकले थोरै मात्र नगद लाभांश घोषणा गरेको हुँदा शेयरधनीको बैंक खातामा नगद लाभांश भने हात पर्ने छैन् । साधारण सभाले बैंकले प्रस्ताव गरेको लाभांश पारित भएमा लगानीकर्ताको शेयर कित्ता भने १३.३ प्रतिशतले बढ्नेछ ।
माछापुच्छ्रे बैंकपछि छिटो साधारण सभा आह्वान गर्ने अर्को बैंकमा यस वर्ष सिटिजन्स बैक इन्टरनेसनल परेको छ । बैंकले असोज २६ गते साधारण सभा आह्वान गरेको छ भने लाभांशको लागि बुक क्लोज भने असोज १५ गते रहेको छ । बैंकले करसहित गरेर ५.६९ प्रतिशत नगद लाभांश घोषणा गरेको थियो । १५ गतेभन्दा अगाडि बैंकको शेयर किन्ने लगानीकर्ताको खातामा बैंकले घोषणा गरेको कर काटेर ५.६९ प्रतिशत नगद लाभांश दशैं अगाडि नै डिपोजिट गरिदिनेछ ।
विगत दुई वर्षदेखि लगानीकर्ताको हात खाली पारेको एनआईसी एसिया बैंकले लगानीकर्तालाई २९ प्रतिशत बोनस र १.५२ प्रतिशत नगद लाभांश गरेर कुल ३० दशमलब ५२ प्रतिशत लाभांश वितरणको घोषणा गरेको छ । बैंकले कर प्रयोजनको लागि थोरै मात्रै नगद लाभांश घोषणा गरेको हुँदा बैंक खातामा नगद डिपोजिट नभएपनि शेयर संख्या भने २९ प्रतिशतले बढ्ने भएको छ ।
कुनै समय ब्लु चिप शेयरको रुपमा रहेको एभरेष्ट बैंकले लगानीकर्ताले बोनस र नगद लाभांशको अनुपात मिलाएर दिएको छ । अहिलेको मन्दीमा लगानीकर्ताको नगद आवश्यकतालाई महसुस गरेर कम्पनीले १० प्रतिशत बोनस र करसहित १० दशमलब ५३ प्रतिशत नगद लाभांश समेत घोषणा गरेको हो । कम्पनीले असोज ३० गते साधारण सभा आह्वान गरेर असोज १६ गते बुक क्लोजको सूचना प्रकाशित गरेका छन् । कम्पनीको लाभांश खान चाहने लगानीकर्ताले असोज १६ गते अगावै बैंकको शेयर खरिद गर्नुपर्नेछ ।
लाभांश घोषणा गरेका पाँच वटा बैंकमध्ये सबैभन्दा ढिला साधारण सभा भने सानिमा बैंकले घोषणा गरेको छ । बैंकले कात्तिक २ गते साधारण सभाको आह्वान गरेको हो । बैंकले ९ प्रतिशत बोनस र ५.७ प्रतिशत नगद लाभांश गरी कुल १४.७ प्रतिशत लाभांश घोषणा गरेको हो । बैंकको लाभांश प्राप्त गर्न भने असोज २९ गत अगावै कम्पनीको शेयर खरिद गर्नुपर्नेछ ।
गत आर्थिक वर्षको नाफाबाट अहिलेसम्म ५ वटा वाणिज्य बैकसँगै एक लघुवित्त, एक होटल र १५ वटा म्युचुएल फन्ड गरी २२ वटा सूचीकृत संस्थाले लाभांश घोषणा गरेका छन् ।
