धितोपत्र बाँडफाँड निर्देशिकामा साधारण सेयरमा दुई लाख आवेदन परेमा तीस दिनमा सेयर बाँडफाँड गर्नु पर्ने व्यवस्था छ । त्यसै गरि दुई लाख एक देखि तीन लाख आवेदन परेको खण्डमा ४० दिनमा बाँडफाँड गर्नु पर्ने हुन्छ भने तीन लाख एक भन्दा माथिको संख्यामा सेयर आवेदन परे ५० दिनमा सेयर बाँडफाँड गर्नु पर्ने हुन्छ ।
उल्लेखित बाँडफाँड समयावधिलाई हेर्दा हिमालयन पावर पार्टनरको साधारण सेयर बाँडफाँड हुन कम्तीमा पनि सेयर निष्काशन बन्द भएको मितिले ३० दिन समय लाग्नेछ । असार पाँच गते सेयर निष्काशन बन्द भए पछि माथि उल्लेखित व्यहोरा अनुसार उसको सेयर बाँडफाँड साउन पहिलो साता मात्र हुनेछ ।
यहाँ भन्न खोजिएको कुरा यो हो कि, धितोपत्र बोर्डले लागू गरेको नयाँ निर्देशिका आगामी साउन एक गतेदेखि कार्यान्वायनमा आउँदैछ । यस आधारमा हिमालयन पावर पार्टनरको साधारण सेयर सबै आवेदकलाई अनिवार्य रुपमा १० कित्ताका दरले बाँडफाँड गर्नु पर्ने हुन्छ । १० कित्ताका दरले सबै आवेदकलाई सेयर बाँडफाँड गर्न नसकिएको खण्डमा मात्र गोलाप्रथाबाट सेयरधनी छनौट गर्नु पर्ने हुन्छ ।
यस अर्थमा हिमालय पावरमा सेयर आवेदन गर्ने सबै आवेदकले १० कित्ता सेयर पाउने छन् । अनि मात्र धेरै कित्ताको विषय आउँछ । सेयर नपुगेर गोलाप्रथामा गएको खण्डमा कोही पनि लगानीकर्ताले १० कित्ताभन्दा धेरै सेयर पाउने छैनन् ।
यस अघि नै धितोपत्र बोर्डले संस्थागत लगानीकर्तालाई सेयर आवेदनमा बन्देज लगाइसकेको छ । यो व्यवस्थाले दुई लाख १० हजार तीनसय आवेदकलाई १० कित्ताका दरले सेयर बाँडफाँड गर्न पुग्ने देखिन्छ । कम्पनीले २१ लख ३० हजार आठ सय ३४ कित्ता साधारण सेयर असार एक गतेदेखि पाँच गतेसम्म निष्काशन गरिरहेको छ ।