नेपाल लाइफ इन्स्योरेन्सले चालु आर्थिक बर्षको पहिलो त्रैमाससम्ममा १७ करोड ७४ लाख ख्ुद नाफा गरेको छ । यो मुनाफा गतबर्षको यसै अवधिको तुलनामा दुई सय प्रतिशत भन्दा धेरै हो । गतबर्षको यसै अवधिमा कम्पनीले ५ करोड ८९ लाख मुनाफा गरेको थियो ।
कम्पनीले हाल सार्वजनिक गरेको मुनाफा बीमाकींय मुल्यांकन भन्दा अगाडिको हो । बीमाकींय मुल्यकांकन पश्चात कम्पनीको वास्तविक नाफा अझै बढी हुनसक्छ ।
बीमा समितिले तोकेको भन्दा बढी चुक्तापूँजी पु्र्याएको कम्पनीको जगेडाकोष, वीमाकोष तथा महाविपत्तीकोष समेत मजबुत बन्दै गएको छ । तीन अर्ब ९ करोड चुक्तापूँजी रहेको कम्पनीको जगेडा कोषमा ४ अर्ब ८६ करोड रुपैयाँ छ ।
त्यस्तै जीवन बीमा कोषको आकार समेत बढाउदै लगेको कम्पनीले जीवन बीमा कोषमा ४३ अर्ब ३६ करोड राखेको छ । भने महाविपत्तीकोषमा २६ करोड रुपैयाँ राखेको छ ।
कम्पनीले हालसम्म ५६ अर्ब रुपैयाँ कुल बीमा शुल्क आर्जन गरेको छ भने चालु आर्थिक बर्षको पहिलो त्रैमासमा मात्रै ३ अर्ब ८० करोड कुल बीमा शुल्क आर्जन गरेको छ । यो गत बर्षको पहिलो त्रैमासको तुलनामा ४० प्रतिशतले बढी हो ।
कम्पनीको जीवन बीमा लेखको संख्या १० लाख ९४ हजार पुगेको छ । उसले यसअवधिमा एक अर्ब २० करोड दावी भुक्तानी गरेको छ भने ७६ करोड दावी भुक्तानी गर्न बाँकी छ ।
नेपाल लाईफको प्रति सेयर आम्दानी २२ रुपैयाँ, प्रतिसेयर नेटवर्थ २६५ रुपैयाँ र प्रतिसेयर कुल सम्पतिको मूल्य १६६६ रुपैयाँ रहेको छ ।
