एनआईबिएल क्यापिटलले दिएको जानकारी अनुसार साधारण सेयरको प्रारम्भिक कटअफ मूल्य ८०३ रुपैयाँ कायम भएको छ । लघुवित्तको सेयरमा ८०३ रुपैयाँमा बोलपत्र पेश गरेका लगानीकर्ताले मागेजति नै सेयर पाएका छन् भने ८०२ रुपैयाँमा आवेदन गर्नेले समानुपातिक रुपमा सेयर प्राप्त गरेका छन् । यो प्रारम्भिक तथ्याङ्क भएकोले अन्तिम नतिजा आउँदा भने केही परिवर्तन पनि आउनसक्ने क्यापिटलको भनाई छ ।
लघुवित्तले लिलामीमा ल्याएको ९३ हजार २७ कित्ता साधारण सेयरका लागि अधिकतम १३०० रुपैयाँसम्मको आवेदन परेको छ । रावत थारुले एक सय कित्ता सेयरका लागि सो रकम खर्चिएका हुन् ।
लघुवित्तको संस्थागत लगानीकर्ताको तर्फबाट आवेदन गरेको प्रभु क्यापिटलले ९९९ रुपैयाँमा पाँच हजार कित्ता सेयर हात पारेको छ । ग्लोबल आईएमई क्यापिटलले ११२० रुपैयाँ २१ पैसामा दुई हजार, क्यापिटलको व्यवस्थापनमा सञ्चालित ग्लोबल आईएमई समुन्नत योजनाले ११०६ रुपैयाँ ७५ पैसामा पाँच हजार कित्ता सेयर प्राप्त गरेको छ ।
त्यस्तै एनआईबिएल क्यापिटलको व्यवस्थापनमा सञ्चालित प्रगति फण्ड र समृद्धि फण्डले ९०९ रुपैयाँ ०९ पैसामा २७५० कित्ताका दरले प्राप्त गरेका छन् । व्यक्तिगत आवेदकले थोरै कित्ताको माग बढी मूल्यमा माग पर्दा संस्थागत लगानीकर्ताले माग अनुसार नै धेरै कित्ता हात पार्न सफलता मिलेको हो ।
व्यक्तिगत लगानीकर्ताको तर्फबाट रत्न चौधरीले ८० हजार कित्ता सेयर माग गरेपनि ज्यादै न्यून मूल्य १०१ रुपैयाँमा बोलपत्र पेश गरेकाले प्राप्त गर्न सकेनन् ।
उता लघुवित्तको एक लाख दुई हजार ६८० कित्ता संस्थापक लिलामीमा १३ वटा बोलपत्र पेश भएकोमा ४ जनाले सेयर प्राप्त गरेका छन् । संस्थापक समूहको सेयरका लागि अधिकतम २०० रुपैयाँसम्म आवेदन परेकोमा १३० रुपैयाँ कटअफ मूल्य निर्धारण भएको क्यापिटलले जनाएको छ ।
लघुवित्तले गत असोज २ देखि कात्तिक २० गतेसम्म हकप्रद बिक्री आब्हान गर्दा अवितरित सेयर लिलामीबाट बिक्री गरेको हो । चालु आर्थिक बर्षको प्रथम त्रैमासमा आरएसडिसीले ५६ लाख ८५ खुद नाफा कमाएर प्रतिसेयर आम्दानी १९ रुपैयाँ ७७ पैसा छ ।
लघुवित्तको सेयर मंगलबार प्रतिकित्ता ११८५ रुपैयाँमा कारोबार भएको छ । यस अाधारमा कटअफ मूल्यमा सेयर प्राप्त गर्ने लगानीकतार्ले प्रतिकिोा सेयरमा ३८२ रूपैयाँसम्म कमाएका छन् ।
