अर्थमन्त्री बोहराले आफ्नो प्रदेशले स्थानीय ऋणपत्र जारी गर्ने गृहकार्य गरिरहेको जानकारी दिँदै लगानीकर्ता आकर्षित गर्न लगानीमैत्री कार्यक्रम बजेटमा समेटेको बताए । उनले लगानी भित्र्याउन र लगानीमैत्री वातावरण निमार्णमा आफुले कुनै कसर बाँकी नराख्ने बताए ।
पूँजी बजारलाइ विश्वासनिय बनाउन र लगानीमैत्री वातावरण निमार्णका लागि नियामक निकायले नीति निमार्ण गर्दा नै विशेष जोड दिनुपर्ने बताए । उनले भने ‘प्रदेश नम्बर सातमा ब्रोकरको संख्या बढाउँदै सर्वसाधारणलाइ समेत पूँजी बजारतर्फ आकर्षित गर्न आवश्यक छ ।’
नेपाल धितोपत्र बोर्डका अध्यक्ष रेवत बहादुर कार्कीले लगानी प्रर्वद्धनका लागि प्रदेश स्तरीय कार्यालयहरु स्थापना गर्न सकारात्मक रहेको बताए ।
यसैगरी नेप्सेका प्रमुख कार्यकारी अधिकृत चन्द्रसिंह साउदले अनलाइन कारोबार प्रणाली कार्यान्वयनमा आएपछि बजारको पहुँच विस्तार हुने बताउँदै छिट्टै कार्यान्वयनमा ल्याइने बताए ।
नेपाल धितोपत्र बोर्ड, नेपाल स्टक एक्सचेञ्ज, र सिडिएस एण्ड क्लिरिङ्गले संयुक्त रुपमा आयोजना गरेको कार्यक्रममा बोर्डका कार्यकारी निर्देशक निरज गिरी, नेप्सेका प्रमुख कार्यकारी अधिकृत चन्द्रसिंह साउद , सिडिएस एण्ड क्लियरिङ्गका प्रमुख कार्यकारी अधिकृत देव प्रकाश गुप्ता लगायतले पूँजी बजार, सि–आस्वा, सेयर डिम्याट, र लगानी सम्बन्धी विविध जानकारी सहभागिलाई गराएका थिए ।
कार्यक्रममा विभिन्न बैंक तथा वित्तीय संस्थाका पदाधिकारीहरु, स्थानीय उद्योगी व्यवसायीहरु, विद्यार्थी लगायत दुई सय बढीको सहभागिता रहेको थियो ।
