राष्ट्रिय वाणिज्य बैंक लिमिटेडको चालु आर्थिक वर्ष २०७४/०७५ को तेश्रो त्रैयमाससम्म ३ अर्ब ८ करोड रुपैयाँ खुद मुनाफा गर्न सफल भएको छ । अघिल्लो आवको यस अवधिमा बैंकले २ अर्ब ७ करोड रुपैंयाँ खुद मुनाफा गरेको थियो ।
यस अवधिमा बैंकको कुल सञ्चालन आम्दानी ७ अर्ब १ करोड रुपैंयाँ गरेको छ भने अघिल्लो आवको यस अवधिमा बैंकले ५ अर्ब ५२ करोड रुपैंया कुल सञ्चालन आम्दानी गरेको थियो । बैंकको सञ्चालन आम्दानीमा भएको वृद्धि, कुशल आन्तरीक व्यवस्थापन र व्यवसायिक दक्षता अभिबृद्धिबाट सो उपलब्धी हासिल भएको बैंकका प्रमुख कार्यकारी अधिकृत किरण कुमार श्रेष्ठले बताए ।
यस अवधिमा बैंकको निक्षेप १ खर्ब ५३ खर्ब रुपैंयाँ, कर्जा १ खर्ब १२ अर्ब रुपैयाँ र लगानी ३३ अर्ब ७९ करोड रुपैंयाँ रहेको छ । बैंकको चुक्ता पूँजी ८ अर्ब ५८ करोड रुपैंयाँ भन्दा बढि रहेको छ । बैंकको भाका नाघेको कर्जा २.९० प्रतिशत रहेको छ ।
बैंकको हाल ६९ जिल्लामा १८६ वटा शाखा कार्यालय, १३० वटा एटिएम, ९३ वटा शाखा रहित बैंकिङ्ग र ६८ वटा शाखाहरुबाट सरकारी कारोबार हुंदै आइरहेको छ । राष्ट्रिय वाणिज्य बैंक र साविक एन.आई.डि.सी. डेभलपमेन्ट बैंक बीच बैशाख १९ गतेदेखि एकीकृत कारोबार हुँदैछ ।
