हाल कोशीमा बादलले ढाकिसकेको छ भने त्यसको प्रभाव कोशी लगायत मधेश प्रदेश, बागमती र गण्डकीसम्म देखिने विभागले जनाएकाे छ ।
मौसमविद् प्रतिभा मानन्धरका अनुसार मंगलबार बादल लाग्ने र हल्कादेखि मध्यम वर्षा हुने छ । "विशेष गरी कोशी प्रदेशमा हल्का र मध्यम वर्षा हुने छ भने मधेश, बागमती र गण्डकी प्रदेशसम्मै फैलिने छ, सुदुरपश्चिम, कर्णाली र लुम्बिनीमा कम नै छ,” उनले बताइन् । यसकाे असर भोलि र पर्सीसम्मै रहने तर ठूलो अनि लगातारको वर्षा भने नहुने उनले बताएकी छिन् ।
यद्धपी यसअघिको वर्षाले देशका सबै भूभाग गलेको हुँदा थोरै पानी पर्दा पनि बाढीपहिरोको सम्भावना भने यथावत रहेको विभागले जानकारी दिएकाे छ ।
हाल देशभर मनसुनी वायुको प्रभाव कायमै छ । भारतको मध्य प्रदेश र आसपास क्षेत्रमा रहेको न्यून चापीय प्रणालीको आंशिक प्रभाव नेपालमा रहेको छ। महाशाखाका अनुसार आज राति कोशी लगायत देशको पहाडी भूभागमा आंशिकदेखि साधारणतया बदली हुने छ र हल्कादेखि मध्यम वर्षा पनि हुनेछ । बुधबार कोशी, मधेश प्रदेश र बागमती र गण्डकी प्रदेशमा बदली भई हल्कादेखि मध्यम वर्षा हुने भएकाे छ ।
यसैगरी, बिहीबार पनि सोही अवस्थामै रहने विभागले जनाएको छ । कोशी प्रदेशका एक दुई स्थानमा भारी वर्षाको सम्भावना पनि रहेको छ ।
