भारत भ्रमणको क्रममा उनी पुग्ने स्थानहरु, खेल मैदानहरुको सरसफाई र पुननिर्माणको काम अहिले धमाधम भइरहेको छ । उनी सबैभन्दा पहिले कोलकोता, त्यसपछि अहमदावाद, मुम्वई र अन्तिममा दिल्ली पुग्नेछन्, जहाँ उनले भारतीय प्रधानमन्त्री नरेन्द्र मोदी र राष्ट्रपति द्रौपती मुर्मुसँग भेट गर्नेछन् । कोलकोतामा मुख्यमन्त्री ममता बनर्जी र मुम्बईमा त्यहाँका मुख्यमन्त्री देवेन्द्र फणनविसले उनको स्वागत गर्नेछन् ।
उनको भ्रमणको अवसर पारेर आयोजना गरिएको कार्यक्रमलाई लक्षित गर्दै मुम्बईको वानखडे स्टेडियमको रंगरोगन र पुननिर्माणको काम भइरहेको भारतीय संचारमाध्यहरुले उल्लेख गरेका छन् । उनीहरुका अनुसार उक्त खेल मैदानमा डिसेम्बर शुरुदेखि १५ तारिखसम्मका अन्य कार्यक्रमहरु रद्ध गरिएको छ ।
समाचार अनुसार मेस्सीको भ्रमणकै अवसर पारेर कोलकत्ताको भिआईपी रोडमा रहेको श्रीपुरमा ७० फिट अग्लो उनको शालिक पनि अनावरण गरिदैंछ । शालिक निर्माणको काम अन्तिम चरणमा पुगे पनि त्यो उनी आफैले अनावरण गर्ने कि भारतीय प्रधानमन्त्री वा अरु कसैबाट अनावरण गराउने भन्ने यकिन भएको छैन ।
१३ डिसेम्बरमा कोलकोत्ताको इडन गार्डेन खेल मैदानमा आयोजना गरिएको मैत्रीपूर्ण खेलमा उनले भाग लिनेछन्, जहाँ भारतका फुटवल, क्रिकेट लगायतका विभिन्न क्षेत्रका प्रतिष्ठित खेलाडीहरु सहभागी हुनेछन् । त्यहाँ १ घण्टा २० मिनेट बस्ने मेस्सीलाई पश्चिम बंगाल सरकारको तर्फबाट मुख्मन्त्री ममता बनर्जीले विशेष सम्मान गर्नेछिन् ।
उक्त कार्यक्रमको लागि न्यूनतम ३५ सय भारु टिकट दर तोकिएको छ । तर, अहिलेसम्म टिकट बुकिङ खोलिएको छैन । उक्त रंगशाला ६८ हजार दर्शक क्षमताको छ । मेस्सीलाई हेर्न आउनेहरुको भीड नियन्त्रणको लागि उनी जाने हरेक स्थानहरुमा विशेष सुरक्षा व्यवस्था अपनाउन लागिएको बताइएको छ ।
मेस्सीले भारतका फुटबल खेलाडीहरुसँग विशेष अन्तरकृया गर्ने र त्यसक्रममा भारतीय फुटबलको विकासमा सहयोग पुर्याउने बारेमा विशेष किसिमको घोषणा गर्नसक्ने बताइएको छ । स्मरण रहोस यस अघि सन् २०११ मा २ दिनको लागि मेस्सी भारत भ्रमणमा आएका थिए ।
