म्युचुअल फन्डहरुले निक्षेपको ब्याज दर घट्दै गएपछि बैंकमा पैसा राख्नु सट्टा शेयर बजारमै लगानी बढाउन थालेका छन् । नेपाल धितोपत्र बोर्डले स्वीकृति दिएका विभिन्न ४७ वटा  म्युचुअल फन्डहरुको शेयर बजारमा लगानी जेठ महिनाको तुलनामा बढेको देखिएको छ ।

तथ्यांक अनुसार नेप्सेमा सूचीकृत कम्पनीहरुमा ६ दशमलब ५५ प्रतिशत र नेप्सेमा सूचीकृतनभएका कम्पनीहरु ११ दशमलब ३६ प्रतिशतले  म्युचुअल फन्डहरुको लगानी बढेको देखिएको छ । ४७ वटा कम्पनीहरुले नेप्सेमा सूचीकृत कम्पनीहरुमा जेठ महिनामा ४५ अर्ब ९६ करोड रुपैयाँ लगानी गरेकोमा असार महिनामा यो बढाएर ४८ अर्ब ९७ करोड रुपैयाँ पुर्याएका छन् । त्यस्तै नेप्सेमा सूचीकृत नभएका कम्पनीमा जेठ महिनासम्म १ अर्ब ४४ करोड रुपैयाँ लगानी रहेकोमा असार महिनासम्ममा ११ दशमलब ३६ प्रतिशतले बढाएर १ अर्ब ६० करोड ८५ लाख रुपैयाँ पुर्याएका छन् । तथ्यांक अनुसार एनआईबील सहभागिता फन्डको सबैभन्दा धेरै लगानी नेप्सेमा सूचीकृत र सूचीकृत हुन बाँकी सबै कम्पनीहरुमा बढी देखिएको छ । एनआईबीएल सहभागिता फन्डको असार मसान्तसम्म सूचीकृत कम्पनीहरुमा लगानी ४ अर्ब ९२ करोड रुपैयाँ छ भने सूचीकृत नभएका कम्पनीहरुमा लगानी ३५ करोड ८२ लाख रुपैयाँ रहेको छ ।

बढ्यो खुद सम्पत्ति मूल्य (न्याभ)

शेयर बजारको वृद्धिसँगै  म्युचुअल फन्डहरुको खुद सम्पत्ति मूल्यमा समेत वृद्धि देखिएको छ । तथ्यांक अनुसार जेठ महिनाको तुलनामा असार मसान्तमा  म्युचुअल फन्डहरुको न्याभ ०.५८२० विन्दुले बढेकोछ । प्रति ईकाई १० रुपैयाँ भए पनि सो मूल्य भन्दा पनि तल्लो विन्दुमा रहेको  म्युचुअल फन्डहरुको न्याभ विस्तारै बढ्न थालेको छ । असार मसान्तको तथ्यांक अनुसार सबैभन्दा धेरै न्याभ प्रभु स्मार्ट फन्ड (पीआरएसएफ)को १३ रुपैयाँ ५३ पैसा रहेको छ भने सबैभन्दा कम न्याभ प्रभु सिस्टमेटिक इन्भेष्टमेन्ट स्किम (पीएसआईएस)को १० रुपैयाँ ५ पैसा रहेको छ । असार मसान्तमा प्रकाशित तथ्यांक अनुसार कुनै पनि  म्युचुअल फन्डको न्याभ १० रुपैयाँ भन्दा मुनि छैन ।

मुद्दती निक्षेप र बैंक ब्यालेन्स दुबै घटदै

म्युचुएल फन्डहरुले प्रकाशित गरेको वित्तीय विवरण अनुसार  म्युचुअल फन्डहरुले विस्तारै मुद्दती निक्षेपमा पैसा राख्न छाडेका छन् । ४७ वटा  म्युचुअल फन्डमध्ये २३ वटाको मात्र सीमित मात्रामा मुद्दती निक्षेप बाँकी रहेका छन् । २३ वटामध्ये पनि धेरैको मुद्दती निक्षेप जेठ महिनाको भन्दा असार महिनामा घटेको छ । तथ्यांक अनुसार ४७  म्युचुअल फन्ड योजनामध्ये रिलायवल समृद्धि योजनाले मात्रै सबैभन्दा बढी ३३ करोड ६९ लाख रुपैयाँ मुद्दती निक्षेपमा राखेका छन् ।

म्युचुअल फन्डहरुको औसत बैंक ब्यालेन्स भने घटेको छ । ४७ वटा  म्युचुअल फन्डले जेठ महिनामा ८ अर्ब ८० करोड रुपैयाँ बैंकमा राखेकोमा असार महिनामा यो रकम घटेर ८ अर्ब ७८ करोडमा सिमित भएको छ। ४७ मध्ये २५ वटामा बैंक व्यालेन्स बढेको छ २२ वटाको घटेको छ ।