माघ १८ गते आइतबारदेखि सर्वसाधारणका लागि बिक्री खुला गर्ने तालिका भए पनि प्राविधिक कारणले मेरो शेयरको प्रणालीमा यो आईपीओ नदेखिएपछि लगानीकर्ताहरूमा चासो र चिन्ता बढेको हो। आइतबार बिहान १० बजेदेखि नै धेरै लगानीकर्ताहरू मेरो शेयर एप र वेबसाइटमार्फत आवेदन दिन सक्रिय भएका थिए। तर, 'My ASBA' खण्डको 'Current Issue' मा जाँदा त्यहाँ कुनै पनि रेकर्ड नभेटिएपछि (No Record Found) लगानीकर्ताहरूले सामाजिक सञ्जालमार्फत आफ्नो गुनासो व्यक्त गर्न थालेका थिए।
यस समस्याको मुख्य जड सफ्टवेयरमा प्रविष्टि गरिएको विवरणमा रहेको त्रुटि भएको पाइएको छ। सूर्यकुण्ड हाइड्रो इलेक्ट्रिक लिमिटेडको आईपीओ निष्कासन तथा बिक्री प्रबन्धक कुमारी क्यापिटल लिमिटेडले सी-आस्वा (C-ASBA) प्रणालीमा विवरण भर्ने क्रममा गम्भीर मानवीय त्रुटि भएको थियो। नेपालमा साधारण शेयरको प्रति कित्ता अंकित मूल्य १०० रुपैयाँ हुने कानुनी व्यवस्था छ। तर, यस कम्पनीको विवरण प्रविष्ट गर्दा झुक्किएर प्रति कित्ता मूल्य मात्र १० रुपैयाँ राखिएको थियो। यदि यो अवस्थामा आवेदन खुला गरिएको भए, लगानीकर्ताहरूले १० कित्ता शेयरका लागि १,००० रुपैयाँको सट्टा मात्र १०० रुपैयाँ तिर्नुपर्ने हुन्थ्यो। यस्तो त्रुटिले पछि ठुलो कानुनी समस्या निम्त्याउन सक्ने र वित्तीय सन्तुलन बिगार्ने भएकाले सिडिएस एण्ड क्लियरिङ लिमिटेड (CDSC) ले तुरुन्तै यो प्रक्रियालाई रोकेको हो।
यस विषयमा आधिकारिक जानकारी दिन सिडिएससीले मेरो शेयरको ड्यासबोर्डमा एउटा जरुरी सूचना सार्वजनिक गरेको छ। उक्त सूचनामा भनिएको छ: "जरुरी सूचना यस कुमारी क्यापिटल लिमिटेडको निष्कासन तथा बिक्री प्रबन्धकत्वमा श्री सूर्यकुण्ड हाइड्रो इलेक्ट्रिक लिमिटेडको सर्वसाधारणहरूको लागि जारी गरिएको अंकित मूल्य रु १००।- को ५,७२,४३१ कित्ता साधारण शेयर मिति २०८२/१०/१८ गते देखि निष्कासन गरिएकोमा सि-आस्बा प्रणालीमा प्रति कित्ता शेयर रु. १०० हुनु पर्नेमा यस क्यापिटलले भुलबस प्रति कित्ता शेयर रु. १० भई निष्कासन खुल्ला भएकोमा सफ्टवेयरमा त्रुटि सच्याउनका लागि केही समयका लागि आवेदन दिन बन्द गरिएको ब्यहोरा सम्बन्धित सबैमा जानकारीको लागि अनुरोध छ । साथै, समस्या समाधान भए पश्चात् आवेदन गर्न पुनः सुचारु गरिने ब्यहोरा समेत यसै सूचना मार्फत जानकारी गराइन्छ । ग्राहक प्रति पर्न गएको असुविधा प्रति क्षमा प्रार्थी छौँ ।"
बिक्री प्रबन्धक कुमारी क्यापिटलका अनुसार अहिले सफ्टवेयरमा देखिएको यो 'डाटा इन्ट्री' त्रुटि सच्याउने कार्य भइरहेको छ। यो प्राविधिक प्रक्रिया पूरा हुनासाथ मेरो शेयरमा पुनः यो आईपीओ देखिनेछ र लगानीकर्ताले साबिक बमोजिम प्रति कित्ता १०० रुपैयाँका दरले नै आवेदन दिन सक्नेछन्। यस प्राविधिक समस्याले गर्दा लगानीकर्ताले केही घण्टा पर्खिनुपर्ने भएको छ।
सूर्यकुण्ड हाइड्रो इलेक्ट्रिक लिमिटेडको आइपिओ निष्कासन बारे विस्तृत जानकारी
यस कम्पनीले दोस्रो चरण अन्तर्गत सर्वसाधारणका लागि आजदेखि कुल ५ लाख ७२ हजार ४३१ कित्ता साधारण शेयर निष्कासन गरेको हो। यसअघि कम्पनीले आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूका लागि शेयर बिक्री गरिसकेको छ। अहिले निष्कासन गरिएको शेयरमा लगानीकर्ताले न्यूनतम १० कित्तादेखि अधिकतम ५०,००० कित्तासम्मका लागि आवेदन दिन सक्ने व्यवस्था छ। यो आईपीओमा छिटोमा माघ २१ गतेसम्म आवेदन दिन सकिनेछ भने सो अवधिमा माग अनुसार आवेदन नपरेको खण्डमा फागुन २ गतेसम्म आवेदन दिने म्याद थप हुन सक्नेछ।
कम्पनीको वित्तीय अवस्था र जोखिमको कुरा गर्दा, केयर रेटिङ नेपालले यसलाई 'केयर एनपी डबल बी माइनस' (CARE-NP BB-) इस्युअर रेटिङ प्रदान गरेको छ, जसले वित्तीय दायित्व बहन गर्ने क्षमतामा मध्यम जोखिम रहेको जनाउँछ। नुवाकोट जिल्लाको दुप्चेश्वर गाउँपालिकामा अवस्थित यस कम्पनीको आयोजना ११ मेगावाट क्षमताको 'माथिल्लो तादी खोला जलविद्युत् आयोजना' हो। यो आयोजनाले गत साउन महिनादेखि नै व्यावसायिक रूपमा विद्युत् उत्पादन सुरु गरिसकेको छ र उत्पादित ऊर्जा नेपाल विद्युत् प्राधिकरणले खरिद गरिरहेको छ। आयोजनाको कुल लागत २ अर्ब ३६ करोड ८४ लाख ४० हजार रुपैयाँ रहेको छ भने प्रति मेगावाट लागत २१ करोड ५३ लाख १२ हजार रुपैयाँ पर्न गएको छ।
चालू आर्थिक वर्षको पहिलो त्रैमासको अपरिष्कृत वित्तीय विवरण अनुसार कम्पनीको प्रति शेयर नेटवर्थ ९६.०५ रुपैयाँ र प्रति शेयर आम्दानी ५.०८ रुपैयाँ रहेको छ। कम्पनी अहिले २ करोड १८ लाख रुपैयाँ सञ्चित नोक्सानीमा रहेको भए पनि उत्पादन सुरु भइसकेकाले आगामी दिनमा वित्तीय अवस्थामा सुधार आउने अपेक्षा गरिएको छ। प्राविधिक समस्या समाधान भएपछि लगानीकर्ताले आफ्ना बैंक खाता भएका सी-आस्वा सदस्य बैंक वा मेरो शेयरमार्फत सजिलै आवेदन दिन सक्नेछन्।
