आज (मंगलबार) बिहानैदेखि विभिन्न सामाजिक सञ्जाल र अनलाइन माध्यमहरूमा "नेप्सेका सिइओ चापागाईंले राजीनामा दिएको" भन्दै खबरहरू प्रकाशित थिए।
उक्त समाचारको वास्तविकता बुझ्न खोज्दा स्वयं सिइओ चापागाईंले त्यसको खण्डन गरेका हुन्।
यस विषयमा प्रतिक्रिया दिँदै सिइओ चापागाईंले आफू नियमित रूपमा कार्यालयमा उपस्थित भई कार्यसम्पादन गरिरहेको बताए। उनले भने, "म आज पनि कार्यालय आएर नियमित काम गरिरहेको छु। मैले राजीनामा दिएको भन्ने समाचारमा कुनै सत्यता छैन। कुन ठाउँबाट र कसरी यस्तो गलत सूचना बाहिरियो, त्यो मैले पनि बुझ्न सकेको छैन।" उनले थप स्पष्ट पार्दै अहिले राजीनामा दिने कुनै पनि योजना वा सोच नरहेको समेत बताए। "यदि राजीनामा दिनु नै पर्ने परिस्थिति आएमा म लुकीछिपी होइन, पत्रकार सम्मेलन गरेरै औपचारिक रूपमा जानकारी गराउनेछु," उनले थपे।
केही फेसबुक पेज र अनलाइनहरूले 'ब्रेकिङ न्युज' भन्दै फोटो कार्डहरू बनाएर सेयर गरिरहेका छन्।
