सम्झौताअनुसार जेनेसिस भेन्चर्सले जारी गर्ने २५ लाख कित्ता साधारण शेयरको सार्वजनिक निष्काशन तथा बिक्री प्रबन्धकको जिम्मेवारी लक्ष्मी सनराईज क्यापिटलले सम्हाल्नेछ ।
सम्झौतापत्रमा लक्ष्मी सनराईज क्यापिटलका प्रमुख कार्यकारी अधिकृत विजयलाल श्रेष्ठ र जेनेसिस भेन्चर्सका अध्यक्ष अनुज राठीले हस्ताक्षर गरेका हुन् । हस्ताक्षर कार्यक्रम दुवै संस्थाका वरिष्ठ अधिकारीहरूको उपस्थितिमा सम्पन्न भएको जनाइएको छ ।
सम्झौतासँगै लक्ष्मी सनराईज क्यापिटलले जेनेसिस भेन्चर्सको प्रस्तावित आईपीओ निष्काशन प्रक्रिया, नियामकीय समन्वय तथा सार्वजनिक बिक्री व्यवस्थापनको काम गर्नेछ । दुवै कम्पनीले यस सहकार्यलाई नेपालको पूँजी बजार विस्तार र सर्वसाधारण लगानीकर्ताका लागि नयाँ लगानी अवसर सिर्जना गर्ने दिशामा महत्वपूर्ण कदमका रूपमा व्याख्या गरेका छन् ।
जेनेसिस भेन्चर्स निजी बजारमा केन्द्रित लगानी कम्पनी हो । कम्पनीले सूचीकरण नभएका इक्विटी अवसरहरूमा लगानी गर्दै उच्च वृद्धि सम्भावना भएका क्षेत्र र दीर्घकालीन मूल्य सिर्जना गर्ने व्यवसायलाई प्राथमिकता दिने जनाएको छ ।
कम्पनीका अनुसार प्रस्तावित आईपीओबाट जुट्ने पूँजी भविष्यका रणनीतिक विस्तार योजना, नयाँ लगानी क्षेत्र पहिचान तथा व्यवसाय विस्तारमा प्रयोग गरिनेछ । नेपालको पूँजी बजारमा निजी लगानी कम्पनीहरूको सहभागिता बढ्दै गएको सन्दर्भमा यो आईपीओलाई चासोका साथ हेरिएको छ ।
