नेपाल आर्थिक पत्रकार संघ(नाफिज)ले आयोजना गरेको बजेटपछिको अन्तरक्रिया कार्यक्रममा बोल्दै मन्त्री वाग्लेले यस्तो बताएका हुन् ।
उनले विद्युतकाे उपभोगमा ५ प्रतिशत भ्याट अनिवार्य रुपमा लाग्ने र त्यसबाट अन्तिम उपभोक्तालाई मर्का नपर्ने गरी विद्युत् महशुल समायोजन गर्न सकिने बताए । ‘विद्युत् उपभोगमा ५ प्रतिशत कर त लाग्छ लाग्छ । तर, हामीले अन्तिम उपभोक्तालाई मर्का नपर्ने गरी विद्युत् महशुल घटाउन विद्युत् नियमन आयोगलाई सिफारीस गर्छौ ।’
‘हामीले विद्युत् नियमन आयोगलाई रिक्वेस्ट गर्छौ कि, मूल्य समायोजन गर्न सकिन्छ कि हेर भनेर । वर्षायाममा बिजुली फालाफाल हुन थालिसक्यो । ५० पैसा मात्र प्रतियुनिट मूल्य घटाइदियो भने पनि राम्रै भयो नि,’ उनले भने ।
अहिलेसम्म खर्बौखर्ब लगानी भएकाे क्षेत्र करको दायराभन्दा बाहिर रहन नसक्ने भएकाले यसपाली करको दायरामा ल्याइएको उनले बताए । ५ प्रतिशत कर लगाउँदा अन्तिम उपभोक्तालाई मर्का नपर्ने गरी मूल्य समायोजनका लागि विकल्प सोचिएको उनले बताए ।
