ब्रसेल्स,(रोयटर्स) 

युरोपेली रोग रोकथाम तथा नियन्त्रण केन्द्र र विश्व स्वास्थ्य संगठन (WHO) द्वारा समर्थित नेटवर्क 'युरोमोमो' (EuroMOMO)ले सार्वजनिक गरेको तथ्याङ्क अनुसार, ज्यान गुमाउनेहरूमध्ये ९ हजारभन्दा बढी अर्थात् ठूलो हिस्सा ६५ वर्ष वा सोभन्दा माथिल्लो उमेर समूहका नागरिक रहेका छन्।

विशेषज्ञहरूका अनुसार अत्यधिक गर्मीले 'हिट स्ट्रोक' निम्त्याउने मात्र नभई मुटु र श्वासप्रश्वाससम्बन्धी पुरानो समस्या भएका बिरामीहरूलाई थप जोखिममा पार्ने गर्दछ। विशेष गरी वृद्धवृद्धाहरू यसको प्रत्यक्ष मारमा परेका छन्।

डेनमार्कको स्टेटन्स सेरम इन्स्टिच्युटका प्रमुख चिकित्सक लासे भेस्टरगार्डले रोयटर्ससँग कुरा गर्दै भने, "वर्षको यो समयमा यति ठूलो संख्यामा मृत्यु हुनु निकै असामान्य र चिन्ताजनक हो। अत्यधिक गर्मीबाहेक यति उच्च मृत्युदरको व्याख्या गर्ने अर्को कुनै ठोस कारण देखिँदैन।"

वैज्ञानिकहरूले दाबी गरेका छन् कि जुनको अन्त्यतिर देखिएको यो भयावह गर्मी मानव-सिर्जित जलवायु परिवर्तनविना "लगभग असम्भव" थियो। जलवायु परिवर्तनकै कारण यस्ता गर्मीका लहरहरू पहिलेभन्दा बारम्बार र अझ तीव्र रूपमा आउन थालेका छन्।

जुन २२ देखि २८ सम्म फ्रान्स, स्पेन, बेलायत र अन्य युरोपेली देशहरूमा गर्मी उच्च विन्दुमा पुगेको थियो। तथ्याङ्क अनुसार सो हप्ता २७ युरोपेली देशहरूमा सामान्य अवस्थाको तुलनामा १०,६५० अतिरिक्त मृत्यु (Excess Deaths) दर्ता गरिएको छ। वैज्ञानिकहरूका अनुसार यो वृद्धिमा कोभिड-१९ जस्ता अन्य कुनै महामारीको भूमिका देखिँदैन।

यसअघिका आठ हप्ताहरूमा युरोपेली देशहरूको औसत मृत्युदर सामान्यभन्दा प्रतिहप्ता ५०० ले कम थियो। तर जुनको गर्मीले फ्रान्स, स्पेन र बेलायतको जनजीवन अस्तव्यस्त पार्यो। विद्यालयहरू बन्द गरिए भने विद्युत आपूर्तिमा समेत अवरोध देखियो।

युरोमोमोका अनुसार जुनको अन्तिम साता फ्रान्स र बेल्जियममा मृत्युदर "अत्यधिक उच्च" रेकर्ड गरिएको छ। बेल्जियमको जनस्वास्थ्य निकाय 'साइन्सानो' का अनुसार सन् २००० यताका गर्मीका लहरहरूमध्ये यो वर्षको मृत्युदर सबैभन्दा उच्च हो।

यसैबीच, सोमबार सार्वजनिक गरिएको अर्को एक अध्ययनले मे र जुन महिनाको गर्मीका कारण इङ्गल्याण्ड र वेल्समा मात्र २,७०० जनाको मृत्यु भएको अनुमान गरेको छ। इम्पेरियल कलेज लन्डन र युके मेट अफिसको निष्कर्ष अनुसार, तीमध्ये ४२ प्रतिशत मृत्यु प्रत्यक्ष रूपमा विश्वव्यापी तापक्रम वृद्धि (Global Warming) ले बढाएको अतिरिक्त गर्मीका कारण भएको हो।