बिहीवार आयोजित पत्रकार सम्मेलनमा ह्वाइट हाउसकी प्रेस सचिव क्यारोलिन लेभिटले इरानले अझै पनि अमेरिकी राष्ट्रपतिसँग सम्झौता गर्न इच्छुक रहेको अभिव्यक्ति दिएको जानकारी दिइन् ।
लेभिटका अनुसार दुई पक्षबीच संवाद भइरहेको भएपनि अमेरिकाले आफ्नो सुरक्षा चासोमा कुनै सम्झौता नगर्ने स्पष्ट पारेको छ । यसअघि बुधवार राष्ट्रपति डोनाल्ड ट्रम्पले सन् २०२४ डिसेम्बरदेखि इरानको हिरासतमा रहेका एक अमेरिकी नागरिकलाई रिहा गरेकोमा इरानलाई धन्यवाद व्यक्त गरेका थिए । उक्त रिहाइलाई दुई देशबीचको कुटनीतिक सम्बन्ध सुधारको सम्भावित शुरुवातका रूपमा हेरिएको छ ।
यद्यपि, कुटनीतिक संवादका बीच सैन्य कारबाही पनि जारी रहेको छ । अमेरिकी सेन्ट्रल कमाण्ड (सेन्टकम) का अनुसार इरानी सैन्य क्षमतालाई कमजोर तुल्याउने उद्देश्यले बिहीबार स्थानीय समयअनुसार दिउँसो २ बजेदेखि नयाँ चरणको हवाई आक्रमण शुरु गरिएको छ । इरानमाथि अमेरिकाले गरेको यो लगातार छैटौँ रातको आक्रमण हो ।
