यही सोचलाई केन्द्रमा राखेर नेपाली महिलाहरूलाई आत्मविश्वासी, व्यावसायिक र ‘बोस’ लुक प्रदान गर्ने उद्देश्यसहित ‘द बोस लेडी’ ब्रान्ड बजारमा उपस्थित छ ।
विगत केही वर्षयता महिलाका लागि गुणस्तरीय फर्मल पहिरन उपलब्ध गराउँदै आएको यो ब्रान्ड आज केवल एउटा कपडा व्यवसायमा सीमित छैन, बरु महिला आत्मविश्वास, आधुनिक फेसन र व्यावसायिक पहिचानसँग जोडिएको एउटा सशक्त ब्रान्डका रूपमा स्थापित हुँदै गएको छ। २५ वर्ष पुरानो पारिवारिक व्यवसायको बलियो जगमा उभिएर ‘द बोस लेडी’लाई आजको उचाइसम्म पुर्याउने मुख्य व्यक्ति हुन् ह्यारी गोयल। उनले पारिवारिक व्यवसायको अनुभव,नयाँ ब्रान्ड निर्माणको सोच, व्यावसायिक चुनौती, ग्राहकको विश्वास र सफल उद्यमका लागि आवश्यक धैर्य तथा निरन्तरताबारे आफ्ना अनुभव साझा गरेका छन्।
ह्यारी गोयलको परिवारले विगत २५ वर्षदेखि ‘अटायर नेपाल’ नामबाट लुगाको व्यवसाय गर्दै आएको थियो। लामो समयदेखि कपडा व्यवसायमा सक्रिय परिवारको अनुभव र बजारको बुझाइलाई आधार बनाएर उनले समयसँगै परिवर्तन हुँदै गएको उपभोक्ताको आवश्यकता पहिचान गरे। विशेषगरी नेपालमा महिलाहरूको कर्पोरेट, बैंकिङ, व्यवसाय, प्रशासन, सञ्चार तथा विभिन्न व्यावसायिक क्षेत्रमा बढ्दो सहभागितासँगै गुणस्तरीय र आकर्षक फर्मल पहिरनको माग पनि बढिरहेको थियो। यही बजारको सम्भावना र महिलाहरूको बदलिँदो जीवनशैलीलाई ध्यानमा राख्दै दुई वर्षअघि ‘अटायर नेपाल’लाई नयाँ सोच र आधुनिक पहिचानसहित ‘द बोस लेडी’का रूपमा अगाडि बढाइएको हो।
व्यापारको सिलसिलामा इन्डोनेसिया, भियतनाम, चीन र बंगलादेशजस्ता देशको भ्रमण गर्ने क्रममा ह्यारी गोयलले त्यहाँको कर्पोरेट संस्कृति र महिलाहरूको व्यावसायिक पहिरनलाई नजिकबाट नियाले। ती देशमा महिलाहरू विभिन्न व्यावसायिक क्षेत्रमा सक्रिय रहेको र उनीहरूको पहिरनले आत्मविश्वास, नेतृत्व र व्यावसायिक व्यक्तित्वलाई झल्काउने गरेको अनुभव उनले पाए। नेपालमा पनि महिलाहरू कर्पोरेट तथा नेतृत्वदायी क्षेत्रमा तीव्र रूपमा अगाडि बढिरहेका भए पनि उनीहरूको आवश्यकता र रुचिअनुसार गुणस्तरीय फर्मल पहिरनको विकल्प सीमित रहेको उनले महसुस गरे। यही अभावलाई अवसरका रूपमा लिँदै ‘द बोस लेडी’को अवधारणा विकास गरिएको हो। ब्रान्डको उद्देश्य केवल फर्मल लुगा बिक्री गर्नु मात्र नभई महिलाहरूलाई आफ्नो कार्यक्षेत्रमा अझ आत्मविश्वासी, सशक्त र प्रभावशाली महसुस गराउनु पनि हो।
कुनै पनि व्यवसायको दीर्घकालीन सफलता ग्राहकको विश्वास र सन्तुष्टिमा निर्भर हुन्छ। ‘द बोस लेडी’ले हालसम्म करिब दुई लाख ग्राहकलाई सेवा दिइसकेको जनाएको छ। त्यसमध्ये करिब ८० प्रतिशत ग्राहक पुरानै ग्राहक रहेको दाबीले ब्रान्डप्रति ग्राहकको भरोसा र सन्तुष्टिलाई देखाउँछ। एकपटक उत्पादन प्रयोग गरेपछि पुनः खरिदका लागि फर्किनु व्यवसायका लागि ठूलो उपलब्धि हो। गुणस्तर, उचित फिटिङ, आकर्षक डिजाइन र ग्राहक सेवामा निरन्तर ध्यान दिएकै कारण ग्राहकसँग दीर्घकालीन सम्बन्ध निर्माण गर्न सफल भएको कम्पनीको विश्वास छ। ‘द बोस लेडी’को बजार नेपालभित्र मात्र सीमित छैन। दुबई, अस्ट्रेलिया र क्यानडाजस्ता देशबाट समेत उत्पादनको माग आउने गरेको छ।
डिजिटल युगमा अनलाइन किनमेलको विस्तारसँगै ग्राहकले उत्पादनको वास्तविक स्वरूपबारे स्पष्ट जानकारी पाउनुपर्ने आवश्यकता पनि बढेको छ। अनलाइन सपिङमा फोटोमा देखिएको र वास्तविक रूपमा प्राप्त भएको सामानबीच फरक हुने गुनासो सामान्य छ। यही समस्यालाई समाधान गर्न ‘द बोस लेडी’ले फोटोभन्दा भिडियो कन्टेन्टमा बढी जोड दिएको छ। कम्पनीले उत्पादनको वास्तविक रङ, कपडाको गुणस्तर, डिजाइन र फिटिङ ग्राहकले स्पष्ट रूपमा देख्न सकुन् भन्ने उद्देश्यले भिडियोमार्फत प्रचार–प्रसार गर्ने रणनीति अपनाएको छ।
व्यवसायको सफलता जति आकर्षक देखिन्छ, त्यसको पछाडि त्यत्तिकै चुनौती, जोखिम र निरन्तर संघर्ष पनि हुन्छ। ‘द बोस लेडी’ले पनि व्यवसाय विस्तारका क्रममा विभिन्न चुनौतीको सामना गर्दै आएको छ। नेपालमा दक्ष जनशक्तिको अभाव र तालिम दिएर दक्ष बनाइएका कर्मचारीसमेत वैदेशिक रोजगारीका लागि बाहिरिने प्रवृत्तिले व्यवसाय सञ्चालनमा चुनौती थपेको गोयल बताउँछन्। कम्पनीले कर्मचारीलाई तालिम दिएर दक्ष बनाउने र उनीहरूको क्षमता विकासमा लगानी गर्ने गरे पनि केही समयपछि उनीहरू विदेश जाने अवस्थाले निरन्तर नयाँ जनशक्ति तयार गर्नुपर्ने चुनौती सिर्जना हुने गरेको छ। त्यस्तै, विदेशबाट कच्चा पदार्थ आयात गर्दा लाग्ने समय, आपूर्ति व्यवस्थापन र बजारको मागबीच सन्तुलन कायम गर्नु पनि सहज छैन। उत्पादनका लागि आवश्यक सामग्री समयमै उपलब्ध गराउनु र ग्राहकको बदलिँदो मागअनुसार उत्पादन व्यवस्थापन गर्नु व्यवसायका महत्त्वपूर्ण चुनौतीमध्ये पर्छ। तर, लामो अनुभव, निरन्तर सिकाइ र बजारको बुझाइका कारण कम्पनीले यस्ता चुनौतीसँग जुध्दै आफ्नो यात्रा अगाडि बढाइरहेको छ।
आज धेरै युवाहरू डिजिटल प्लेटफर्ममार्फत आफ्नै व्यवसाय सुरु गर्ने सोचमा छन्। तर, व्यवसाय सुरु गरेपछि छोटो समयमै अपेक्षित परिणाम नआउँदा धेरै उद्यम बन्द हुने गरेका छन्। नयाँ उद्यमीका लागि ह्यारी गोयलको मुख्य सन्देश भनेको धैर्य, निरन्तरता र योजनाबद्ध लगानी हो। उनका अनुसार व्यवसाय सुरु गर्ने क्रममा सुरुमै महँगो क्यामेरा, ठूलो स्टुडियो, आकर्षक कार्यालय वा अनावश्यक पूर्वाधारमा धेरै खर्च गर्नुभन्दा पहिले उत्पादनको गुणस्तर र बजारको आवश्यकता बुझ्नुपर्छ। सानो स्तरबाट सुरु गर्दै बिक्री र ग्राहकको विश्वास बढेसँगै व्यवसायलाई विस्तार गर्नु बढी प्रभावकारी हुन सक्छ। व्यवसायमा सफलता एकैदिनमा प्राप्त हुँदैन। त्यसैले सुरुआती चुनौतीबाट निराश नभई निरन्तर सिक्दै, सुधार गर्दै र बजारअनुसार आफूलाई परिवर्तन गर्दै अगाडि बढ्नुपर्ने उनको सुझाव छ।
आज ‘द बोस लेडी’ केवल एउटा लुगा पसल वा फर्मल पहिरनको ब्रान्ड मात्र होइन, नेपाली महिलाको आत्मविश्वास, व्यावसायिक पहिचान र सशक्तीकरणसँग जोडिएको एउटा प्रेरणादायी व्यावसायिक पहलका रूपमा विकसित हुँदै गएको छ। गुणस्तरीय पहिरनले व्यक्तित्व र आत्मविश्वासमा सकारात्मक प्रभाव पार्न सक्छ भन्ने विश्वासका साथ सुरु भएको यो यात्रा अहिले वार्षिक दुई करोड रुपैयाँभन्दा बढीको कारोबार गर्ने व्यवसायका रूपमा विस्तार भएको छ। २५ वर्ष पुरानो पारिवारिक अनुभवलाई आधुनिक सोच, डिजिटल मार्केटिङ, ग्राहक केन्द्रित सेवा र नयाँ ब्रान्ड पहिचानसँग जोड्दै हरि गोयलले परम्परागत व्यवसायलाई नयाँ पुस्ताअनुकूल ढंगले अगाडि बढाएका छन्। ‘द बोस लेडी’को यात्रा केवल व्यवसायिक सफलता मात्र होइन, बजारको आवश्यकता पहिचान गर्ने, ग्राहकको विश्वासलाई प्राथमिकता दिने र चुनौतीका बीच पनि निरन्तर अघि बढ्ने उद्यमशील यात्राको उदाहरण पनि हो। यही कारण, आत्मविश्वासलाई पहिरनसँग र पहिरनलाई सफलताको यात्रासँग जोड्ने ‘द बोस लेडी’ आज नेपाली स्टार्टअप तथा उद्यमशीलताको क्षेत्रमा एउटा प्रेरणादायी नाम बन्दै गएको छ।
भिडियाे
