विश्व शेयर बजारमा रिटर्नको नेतृत्व एसियाली बजारकाे

Aug 16, 2026 05:09 PM Merolagani



सुवास निरौला

अमेरिकी शेयर बजार रेकर्ड उच्चनजिक रहे पनि वर्षगत रिटर्नका आधारमा भने विश्व शेयर बजारको नेतृत्व अहिले अमेरिका बाहिर देखिएको छ। 

दक्षिण कोरिया, ताइवान र जापानका शेयर बजारले अमेरिकी बजारभन्दा निकै उच्च प्रतिफल दिएका छन्। यसको अर्थ अमेरिकी बजार कमजोर भएर पछाडि परेको होइन; अन्य केही बजार अमेरिकी बजारभन्दा धेरै तीव्र गतिले बढेकाले रिटर्नको तुलनामा अमेरिका पछाडि देखिएको हो।

अगस्ट १४, २०२६ सम्मको तथ्यांकअनुसार दक्षिण कोरियाको कोस्पी सूचकांक यस वर्षको सुरुदेखि ६५.५८ प्रतिशत बढेको छ। ताइवानको ताइवान वेटेड ५८.१७ प्रतिशत र जापानको निक्केई २२५ ३६.५० प्रतिशत बढेका छन्। यसको तुलनामा अमेरिकी नास्डाक १५ प्रतिशत, एसएन्डपी ५०० १३.७४ प्रतिशत र डाउ जोन्स ११.८ प्रतिशत मात्रै बढेका छन्।

अर्थात्, कोस्पीले एसएन्डपी ५०० भन्दा करिब ५१.८४ प्रतिशत अंक बढी रिटर्न दिएको छ। ताइवान वेटेडले एसएन्डपी ५०० भन्दा करिब ४४.४३ प्रतिशत अंक बढी, जबकि निक्केई २२५ले करिब २२.७६ प्रतिशत अंक बढी रिटर्न दिएको छ। यही अन्तरका कारण रिटर्नको विश्वव्यापी नेतृत्व अहिले एसियाली बजारतर्फ देखिएको हो।

अमेरिकी बजार भने कमजोर अवस्थामा रहेको निष्कर्ष निकाल्न मिल्दैन। अगस्ट १३ मा एसएन्डपी ५०० नयाँ रेकर्ड उच्चमा पुगेको थियो र अगस्ट १४ मा सामान्य गिरावट आए पनि साताको अन्त्यसम्म लगातार तेस्रो साता वृद्धि कायम गरेको थियो।

त्यसैले अहिलेको प्रश्न “अमेरिकी बजार किन अगाडि छैन?” भन्दा पनि “अमेरिकी बजारभन्दा अरू बजार कति बढी अगाडि छन्?” भन्ने हो। रिटर्नको तथ्यांकले यसको स्पष्ट उत्तर दिन्छ। एसएन्डपी ५०० को एक वर्षको प्रतिफल २०.७१ प्रतिशत हुँदा कोस्पीको ११६.३३ प्रतिशत, ताइवान वेटेडको ८८.२६ प्रतिशत र निक्केईको ५८.४१ प्रतिशत छ।

तीन वर्षको अवधिमा पनि यही तस्वीर दोहोरिन्छ। नास्डाक १००.७२ प्रतिशत र एसएन्डपी ५०० ७८.१५ प्रतिशत बढ्दा ताइवान वेटेड १७७.३६ प्रतिशत, कोस्पी १७६.९२ प्रतिशत र निक्केई २२५ ११७.२७ प्रतिशत माथि छन्। यसले कोरिया, ताइवान र जापानको बलियो प्रदर्शन केवल यस वर्षको छोटो अवधिको घटना नभएको देखाउँछ।

युरोपका केही बजार पनि अमेरिकाभन्दा अगाडि

रिटर्नको नेतृत्व एसियामा मात्र सीमित छैन। युरोपका केही बजारले पनि अमेरिकी एसएन्डपी ५०० भन्दा बढी प्रतिफल दिएका छन्। बुडापेस्ट एसईको वाईटीडी वृद्धि ३५.५९ प्रतिशत, विग २० को २६.६३ प्रतिशत, अस्ट्रियाको एटीएक्सको २६.४१ प्रतिशत र इटालीको एफटीएसई एमआईबीको १९.२२ प्रतिशत छ। एसएन्डपी ५०० को १३.७४ प्रतिशतको तुलनामा यी बजार क्रमशः २१.८५, १२.८९, १२.६७ र ५.४८ प्रतिशत अंक अगाडि छन्।

तर सबै बजारको अवस्था बलियो छैन।

भारतको निफ्टी ५० यस वर्ष ६.७५ प्रतिशत घटेको छ भने सेन्सेक्स ८.४६ प्रतिशत घटेको छ। चीनको सांघाई कम्पोजिट १.०५ प्रतिशत, चाइना ए ५० २.१२ प्रतिशत र हङकङको ह्याङ सेङ २ प्रतिशत घटेका छन्। इन्डोनेसिया कम्पोजिटमा त २५.९६ प्रतिशतको गिरावट छ।

यसको अर्थ “एसियाली बजार बलियो” भन्ने एउटै निष्कर्ष निकाल्न पनि मिल्दैन। एउटै क्षेत्रमा रहेका बजारबीच पनि रिटर्नमा ठूलो अन्तर छ। दक्षिण कोरिया र ताइवान विश्वकै अगाडि देखिँदा भारत, चीन, हङकङ र इन्डोनेसियाजस्ता बजार पछाडि छन्।

एक महिनाको प्रदर्शनले पनि नेतृत्वमा केही बजारको निरन्तरता देखाउँछ

एक महिनाको प्रदर्शन हेर्दा ताइवान वेटेड ७.३६ प्रतिशत, निक्केई ७.१३ प्रतिशत, सांघाई ४.३३ प्रतिशत, सेन्जेन कम्पोनेन्ट ४.७२ प्रतिशत र कोस्पी २.३१ प्रतिशत बढेका छन्। एसएन्डपी ५०० भने ४.४ प्रतिशत र नास्डाक ४.७४ प्रतिशत बढेका छन्।

यसले छोटो अवधिमा भने तस्वीर केही फरक रहेको देखाउँछ। अर्थात् वाईटीडीमा सबैभन्दा अगाडि रहेको बजार नै पछिल्लो एक महिनामा पनि अनिवार्य रूपमा सबैभन्दा अगाडि हुन्छ भन्ने छैन। तर लामो अवधिको रिटर्न हेर्दा कोरिया, ताइवान र जापानको नेतृत्व अझै स्पष्ट छ।

विश्व बजारको समग्र अवस्थालाई एमएससीआई वर्ल्डले पनि सकारात्मक देखाउँछ। एमएससीआई वर्ल्ड यस वर्ष १३.५२ प्रतिशत, एक वर्षमा २०.४८ प्रतिशत र तीन वर्षमा ७३.३२ प्रतिशत बढेको छ।

यसरी हेर्दा अगस्ट १४ सम्मको रिटर्न तथ्यांकले विश्व सेयर बजारमा एउटै किसिमको नेतृत्व नभएको, तर केही एसियाली बजारले असाधारण उच्च प्रतिफल दिएर विश्व बजारको रिटर्न नेतृत्व गरिरहेको तस्वीर देखाउँछ। अमेरिका भने रेकर्ड स्तरमा रहेको र सकारात्मक रिटर्न दिइरहेको भए पनि कोरिया, ताइवान र जापानको तुलनामा कम प्रतिफलका कारण वाईटीडी र्‍याङ्किङमा पछाडि परेको छ।

यो विश्लेषण भोलिको बजार कहाँ जान्छ भन्ने अनुमान होइन। यो अगस्ट १४ सम्म विश्वका प्रमुख शेयर सूचकांकले दिएको प्रतिफलका आधारमा आजको अवस्थामा कुन बजार कति शक्तिशाली देखिन्छ भन्ने तस्वीर मात्र हो।

नोट- प्रस्तुत विश्लेषण विश्वका विभिन्न क्षेत्रका ४६ प्रमुख शेयर बजार सूचकांकको प्रदर्शनमा आधारित छ। सूचकांकको तथ्यांक Investing.com बाट लिइएको हो र अगस्ट १४, २०२६ सम्मको Daily, 1 Week, 1 Month, YTD, 1 Year र 3 Years को रिटर्नलाई आधार बनाएर तुलना गरिएको हो




सुनचाँदीको मूल्यमा भारी गिरावट

Nov 18, 2026 10:46 AM

नेपाली बजारमा मंसिर २ गते, बुधबार पनि सुन र चाँदी दुवैको मूल्यमा भारी गिरावट आएको छ। नेपाल सुनचाँदी व्यवसायी महासंघका अनुसार आज एकैदिन सुनको मूल्य प्रतितोला ६ हजार ३०० रुपैयाँले घटेको हो।