नेपाल सरकार र ऋणीहरूका प्रतिनिधिबिच हिजो भदौ ६ गते भएको वार्तामा १४ बुँदे सहमति भएको थियो । सहमतिसँगै आन्दोलनका कार्यक्रम स्थगित गरी पीडितहरूलाई घर पठाउने प्रक्रिया सुरु गरिएको हो ।
साझा बसमार्फत ३२३ जनाको बिदाइ
सहमति पश्चात् आज बिहान ८:५० बजेदेखि सरकारले साझा यातायातका बसहरूको व्यवस्था गरी ऋणीहरूलाई उनीहरूको गन्तव्यतर्फ पठाएको छ । विभिन्न सरकारी निकायका अधिकारीहरूको उपस्थितिमा ३२३ जना ऋणीहरूलाई ८ वटा बसमार्फत बिदाइ गरिएको छ ।
आन्दोलनका लागि काठमाडौँ आएका झापा, मोरङ, सर्लाही, महोत्तरी, सिन्धुली, बारा, पर्सा र नवलपरासी लगायतका जिल्लाका ऋणीहरूलाई आ-आफ्नो क्षेत्रतर्फ पठाइएको सरकारी अधिकारीहरूले जानकारी दिएका छन् ।
लघुवित्तको ऋणका कारण समस्यामा परेका सर्वसाधारणले न्यायको माग गर्दै लामो समयदेखि काठमाडौँ केन्द्रित आन्दोलन र धर्ना दिँदै आएका थिए । सरकारसँग भएको पछिल्लो सहमतिले पीडितका समस्या समाधान हुने अपेक्षा गरिएको छ ।
