विपद् जोखिम न्यूनीकरण तथा व्यवस्थापन ऐन, २०७४ को दफा ३२ को उपदफा (१) ले दिएको अधिकार प्रयोग गरी राजपत्रमा सूचना प्रकाशन भएको मिति (२०८३ भदौ ११ गते) देखि लागू हुने गरी तीन महिनाका लागि ती क्षेत्रहरूलाई सङ्कटग्रस्त घोषणा गरिएको छ।
राजपत्रमा प्रकाशित सूचना अनुसार रसुवाका उत्तरगया, गोसाइँकुण्ड, कालिका र आमाछोदिङ्मो गाउँपालिकालाई सङ्कटग्रस्त क्षेत्र घोषणा गरिएको छ। त्यसैगरी नुवाकोटका विदुर र बेलकोटगढी नगरपालिका तथा किस्पाङ र तारकेश्वर गाउँपालिका परेका छन्। धादिङका गल्छी, सिद्धलेक, गजुरी र बेनीघाट रोराङ गाउँपालिका, गोरखाको गण्डकी गाउँपालिका तथा तनहुँका देवघाट र आँबूखैरेनी गाउँपालिकालाई पनि सङ्कटग्रस्त क्षेत्र तोकिएको छ। गृह मन्त्रालयका सचिव राजकुमार श्रेष्ठका अनुसार बाढी प्रभावित क्षेत्रमा राहत, उद्धार र पुनर्निर्माणको कामलाई द्रुत गतिमा अघि बढाउनका लागि यी क्षेत्रहरूलाई विपद् सङ्कटग्रस्त क्षेत्र घोषणा गरिएको हो।
