जल तथा मौसम विज्ञान विभाग, मौसम पूर्वानुमान महाशाखाका अनुसार चक्रवात कमजोर बन्दै गए पनि त्यसको जलवाष्पयुक्त हावाका कारण देशभरको मौसम प्रभावित भएको हो।
मौसमविदहरूका अनुसार आज अपराह्नदेखि रातिसम्म विशेष गरी कोशी र बागमती प्रदेशका धेरैजसो स्थानमा मध्यमदेखि भारी वर्षाको सम्भावना रहेको छ। शनिबारदेखि भने यो मौसमी प्रणाली कमजोर हुँदै जाने र मौसममा क्रमिक सुधार आउने पूर्वानुमान गरिएको छ।
अविरल वर्षाका कारण पहाडी तथा हिमाली भूभागमा पहिरो, भू-क्षय र गेग्रान बहावको जोखिम बढ्नुका साथै नदीनालाहरूमा जलसतह बढ्ने चेतावनी दिइएको छ। बाढी र पहिरोको सम्भावित जोखिमलाई ध्यानमा राख्दै सरकार तथा स्थानीय प्रशासन उच्च सतर्कताको अवस्थामा रहेका छन्। सङ्खुवासभालगायत जोखिमयुक्त जिल्लाका स्थानीय प्रशासनले सर्वसाधारणलाई नदी तटीय क्षेत्रमा नजान, यात्रा गर्दा पूर्वसावधानी अपनाउन र आगामी तीन दिनसम्म विशेष सतर्कता अपनाउन आग्रह गरेका छन्।
