तीन हाइड्रोपावर सहित चार कम्पनीको आईपिओमा आवेदन गर्न लगानीकर्ताहरुले तिब्र रुची देखाएका छन् । युनियन हाइड्रोपावरको शेयर बिक्री हुन महिना दिन लागे पनि अन्य कम्पनीको आइपिओमा आवेदन गर्नेको संख्या भने अधिक देखिएको छ ।

बैशाख १२ गते बिहीबार युनियन हाइड्रोपावर, रसुवागढी हाइड्रोपावर, सञ्जेन जलविद्युत र गणपति माइक्रोफाइनान्सको आवेदन समय सकिएको छ । चैत १३ देखि आईपिओ खुला गरेको युनियन हाइड्रोपावर शेयर बिक्न महिना दिन लागे पनि बैशाख ६ गते दखि शेयर निष्काशन गरेका रसुवागढी र सान्जेन जलविद्युत कम्पनी र ९ गते देखि आईपिओ खुला गरेको गणपति माइक्रोफाइनान्सको शेयरमा अधिक आवेदन परेको हो ।

युनियन हाइड्रोपावरको आईपिओमा करिब ३७ करोडको आवेदन

युनियन हाइड्रोपावरले चैत १३ देखि खुला गरेको साधारण शेयर (आईपिओ) मा ३६ करोड ८९ लाख रुपैयाँ बराबरको आवेदन परेको छ । हाइड्रोपावरको बिक्री प्रबन्धक लक्ष्मी क्यापिटलका अनुसार बिहीबार साँझ ५ बजे सम्ममा ४७ हजार १६४ आवेदनबाट ३६ लाख ८९ हजार १९० कित्ता शेयर माग गरेका छन् ।

युनियन हाइड्रोपावरले चैत १३ गतेदेखि आयोजना प्रभावित क्षेत्रका बासिन्दाबाट अवितरित समेत कूल ३५ लाख ३४ हजार ३४० कित्ता शेयर निष्काशनमा ल्याएको थियो । कूल निष्काशित आईपिओ मध्ये ७० हजार ६८६ कित्ता हाइड्रो पावरका कर्मचारीहरुलाई सुरक्षित गरिएको छ । भने बाँकी रहेको ३४ लाख ६३ हजार ६५४ कित्ता शेयर सर्वसाधारणका लागि बिक्रीमा ल्याएको हो ।

रसुवागढीमा १.८९ र साञ्जेन जलविद्युतको आईपिओमा २.८३ गुणा बढी आवेदन

रसुवागढी हाइड्रोपावरको आईपिओमा १.८९ गुणा बढी आवेदन परेको छ । रसुवागढी हाइड्रोपावरको शेयर निष्काशन तथा बिक्री प्रबन्धक सिद्धार्थ क्यापिटलका अनुसार १ करोड ७६ लाख ५ हजार २१० कित्ता शेयर माग भएको छ ।

हाइड्रोपावरको आईपिओमा ३ लाख ७ हजारले एक अर्ब ७६ करोड रुपैयाँ बराबरको आवेदन परेको छ । रसुवागढी हाइड्रोपावरले कर्मचारी र म्युचुअल फण्डलाई छुट्याइएर ९३ लाख ३९ हजार ४६७ कित्ता शेयर सर्वसाधारणलाई बिक्री खुला गरेको थियो ।

यस्तै साञ्जेन जलविद्युत्तको आईपिओमा २.८३ गुणा बढी आवेदन परेको छ । बिहीबार पाँच बजे सम्ममा एक अर्ब ४१ करोड १५ लाख २० हजार रुपैयाँ बराबरको आवेदन परेको बिक्री प्रबन्धक नागरिक लगानी कोषले जनाएको छ । ३ लाख ३ हजार ६८७ आवेदनबाट १ करोड ४१ लाख १५ हजार २०० कित्ता शेयरको लागि आवेदन परेको छ ।

साञ्जेनले कर्मचारी र म्युचुअल फण्डलाई छुट्टाएर सर्वसाधारणमा ४९ लाख ८२ हजार २५० कित्ता शेयरमा आवेदन माग गरेको थियो ।

गणपति माइक्रोफाइनान्समा करिब साढे २१.५५ गुणा बढी आवेदन

गणपति माइक्रोफाइनान्सको आईपिओमा २१.५५ गुणा बढी आवेदन परेको छ। माइक्रोफाइनान्सको शेयर निष्काशन तथा बिक्री प्रबन्धक एनआइबिएल एस क्यापिटलका अनुसार बिहीबार साँझ सम्ममा ३ लाख २९ हजार ४१ आवेदनबाट ६७ लाख ४९ हजार ३३० कित्ता बराबरको ६७ करोड ४९ लाख ३६ हजार रुपैयाँको आवेदन परेको छ ।

कम्पनीले कूल ३ लाख ३५ हजार कित्ता शेयर निष्काशन गरेकोमा ५ हजार १७५ माइक्रोफाइनान्सका कर्मचारीहरुका लागि र १६ हजार ७५० कित्ता सामूहिक लगानी कोषहरुलाई आरक्षण गरि बाँकी रहेको ३ लाख १३ हजार ७५ कित्ता साधारण शेयर निष्काशन गरेको हो।