अमेरिकाद्धारा हुवावेलाई एनटिटी सूचीमा शामिल गरेका कारण गूगलले हुवावेमाथि प्रतिबन्ध लगाएको बताइएको छ ।
जसअनुसार हुवावेले अमेरिकी सरकारको लाइसेन्स बिना त्यहाँको कम्पनीबाट आवश्यक पार्टपूर्जा र प्रविधि किन्न पाउने छैन ।
बिश्लेषकहरुका अनुसार अमेरिकाको कालोसूचीमा परेसँगै हुवावेले आफ्नो सफ्टवेयर अपग्रेड गर्न समेत पाउने छैन ।
हुवावेलाई अमेरिकाद्धारा कालोसूचीमा राखिएमा अमेरिकी कम्पनीलाई ११ अर्ब डलर घाटा हुनसक्ने बताइएको छ ।
गूगलको उक्त निर्णयले हुवावेको उपभोक्ता व्यापार प्रभावित हुनसक्ने बताइएको छ । यद्यपी हुवावेले ओपन सोर्स लाइसेन्सका माध्यमबाट उपलब्ध एन्ड्रोइड अपरेटिङ सिस्टमको भर्जन प्रयोग गर्न सक्नेछ ।
यद्यपी यस विषयमा हुवावेका तर्फबाट हालसम्म कुनै पनि प्रकारको प्रतिक्रिया आइसकेको छैन । दुई महिना पहिले मात्र कम्पनीका सीईओले हुवावेले प्लान बी का अनुसार, मोबाइल अपरेटिङ सिस्टम तयार गरिरहेको बताएका थिए ।
हुवावे विश्वको सबैभन्दा ठूलो दुरसञ्चार उपकरण निर्माता र दोस्रो ठूलो स्मार्टफोन बेच्ने कम्पनीको रुपमा रहेको छ । एजेन्सी