हाल सम्म पनि न्यूनतम चुक्ता पूँजी नपुर्याएका कम्पनीहरुको संचालकहरुलाई बोलाएरै निर्देशन दिएको समितिका कार्यकारी निर्देशन राजुरमण पौडेलले मेराे लगानीलाई जानकारी दिए।
उनले भने, ‘गुराँस लाइफ इन्स्योरेन्स र प्राइम लाइफ इन्स्योरेन्सका संचालकलाई बोलाएरै संस्थापकतर्फको पूँजी ‘कल इन एडभान्स’ मा जम्मा गर्न निर्देशन दिएका छौं। हामीले बाँकी कम्पनीहरुलाई पनि पालै-पालाे बोलाएर निर्देशन दिन्छौ।’ समितिले हकप्रद वापतको संस्थापकबाट प्राप्त हुने रकम जम्मा गर्न निर्देशन दिएको हो ।
समितिले गत साउन ६ गते न्युनतम चुक्ता पूँजी नपुर्याउन बीमा कम्पनीहरुलाई पूँजी पुर्याउन नसक्ने कारण सहित ७ दिनभित्रमा लिखत जवाफ पेश गर्न निर्देशन दिएको थियो। त्यस अनुसार बीमा कम्पनीहरुले हकप्रद निष्काशन गरेर पूँजी पुर्याउने प्रतिबद्धता जनाएका थिए।
बीमा समितिको निर्देशन अनुसार जीवन बीमा कम्पनीले न्यूनतम दुई अर्ब र निर्जीवन बीमा कम्पनीले एक अर्ब रुपैयाँ चुक्ता पूँजी पुर्याउनुपर्ने हुन्छ ।
