शाइन रेसुङ्गा डेभलपमेन्ट बैंकको असार २७ गते सम्पन्न विशेष साधारणसभाले भार्गव बिकास बैंक र पूर्णिमा बिकास बैंकलाई प्राप्ति गर्ने प्रस्ताव पारित गरेको थियो ।जसमध्ये भार्गव बिकास बैंकलाई राष्ट्र बैंक सन्चालक समितिले अनुमति दिएकाे हाे ।
बैंकले एक्वीजिसन पश्चात कायम हुने पूँजीको ४ बारबार १ शेयरको अनुपातमा हकप्रद शेयर निष्काशन गर्ने प्रस्ताव पनि पारित गरिसकेको छ ।
हाल १० जिल्ला कार्य क्षेत्र रहेको शाइन रेसुङ्गा डेभलपमेन्ट बैंक दुई विकास बैंकहरूलाई प्राप्ति गरेपश्चात राष्ट्रिय स्तरको विकास बैंक बन्ने भएको छ ।
यसैगरी राष्ट्र बैंकले उन्नति माइक्रोफाइनान्स र सहकार्य लघुवित्तलाई पनि मर्जरमा जान सैद्धान्तिक सहमति दिएको छ । उन्नति माइक्रोफाइनान्स र सहकार्य लघुवित्त वित्तीयसंस्थाबीच मर्जरमा जान बिहीबार साउन ९ गते प्रारम्भिक सहमति पत्रमा हस्ताक्षर भएको थियो ।
रुपन्देही जिल्लामा केन्द्रीय कार्यालय रहेको उन्नतिले १५ जिल्लामा आफ्नो शाखा विस्तार गरेको छ । सर्लाही जिल्लामा केन्द्रीय कार्यालय रहेको सहकार्यले १० जिल्लामा शाखा विस्तार गरी कारोबार गर्दै आएको छ ।
हाल उन्नतिको चुक्ता पुँजी ८ करोड ८२ लाख ७५ हजार रुपैयाँ र सहकार्यको १ करोड ४० लाख रुपैयाँ रहेको छ । दुई संस्थाबीच पुस महिनाभित्र एकीकृत कारोबार गर्ने सहमति भएको छ । मर्जर पश्चात उन्नति सहकार्य लघुवित्तको नामबाट एकीकृत कारोबार हुनेछ ।
