उच्च अदालत पाटनका उप रजिष्ट्रार तथा प्रवक्ता शम्भु प्रसाद रेग्मीले आइतबार राय किताबमा संक्षिप्त फैसला भएको मेरो लगानीलाई जानकारी गराए । ‘ हिजाे राय किताबमा संक्षिप्त फैसला भएको छ ' रेग्मीले भने । तर पूर्ण फैसला आउन भने अझै केही समय लाग्ने बताइएको छ । 'फुल फेजको फैसला आउन अझै एक महिना लग्न सक्छ ’उनले भने।
कम्पनी ऐन २०६३ काे दफा ५८ काे उपदफा १ ले कम्पनीकाे पूँजी घटाउने बिशेष प्रस्ताव पारित गरेमा साेकाे स्वीकृतिकाे लागि अदालत समक्ष निवेदन दिनु पर्ने व्यवस्था गरेकाे छ । साेही व्यवस्था बमाेजिम कम्पनीले अदालतमा निवेदन दिएकाे हाे ।
कम्पनीको पहिलो साधारण सभाबाट अधिकृत तथा जारी पूँजी ३ अर्ब बाट बढाएर १५ अर्ब पुर्याएको थियो । तर २०७५ पुस १३ मा स्म्पन्न विशेष साधारण सभाले अधिकृत पूँजी १५ अर्ब तथा चुक्ता तथा जारी पूँजी १० अर्ब कायम गर्ने गरी प्रबन्धपत्र तथा नियमावली संसोधन गर्ने प्रस्ताव अनुमोदन गर्यो ।
कम्पनी घटाएको जारी पूँजी १० अर्ब कायम गर्न अदालती प्रकृयामा गएको थियो ।उक्त प्रकृयाका लागि कम्पनीका तर्फबाट तत्कालीन निमित्त प्रमुख कार्यकारी अधिकृत दामोदर भण्डारीले उच्च अदालत पाटनमा निबेदन दिएका थिए । उनले गत कार्तिक २८ मा निबेदन दिएका हुन् ।
जारी पूँजी घटाउन अदालतको पूर्ण आदेश पाएपछि मात्रै कम्पनीले सार्वसाधारणको लागि प्रथमिक शेयर (आईपीओ) निष्काशन गर्ने भएको छ । ‘आईपीओ निष्काशनको सम्पूर्ण तयारी सकेका छौं ' कम्पनीका पुर्नबीमा विज्ञ विष्णु प्रसाद उपाध्यायले भने । पूर्ण पाठ आएसँगै शेयर निष्कासन गर्ने कम्पनीको तयारी छ । 'अहिले सम्म हामीले अदालतको आदेशको पूर्ण पाठ पाइसेकका छैनौं । त्यो पाउने वित्तिकै आईपीओ निष्काशनको प्रकृया थप अघि बढ्छ ’उनले भने ।
कम्पनीले शेयर निष्काशनको लागि अन्य तयारी भने सकिएकाे जनाएको छ । उसले १ अर्ब ६० करोड रुपैयाँको बराबरको १ करोड ६० लाख कित्ता आईपीओ निष्काशन गर्ने छ । जसका लगि उसले गत भदौ २२ मै नियामक निकाय नेपाल धितोपत्र बोर्डमा अनुमति माग गर्दै निबदन दिइसकेकाे छ । उसले क्रेडिट रेटिङ समेत गराइसकेको जनाएको छ । जसमा इक्रा नेपालले ‘इक्रा एनपि आईपीओ ग्रेड २’ रेटिङ्ग प्रदान गरेको छ । इक्रा नेपालले प्रदान गरेकाे उक्त रेटिङ्गले कम्पनीको वित्तीय अवस्था औसत भन्दा माथि रहेको जनाउँछ।
शेयर निष्काशनका लागि कम्पनीले आरबिबि मर्चेण्ट बैंकिङ्गलाई धितोपत्र निष्काशन तथा बिक्री प्रबन्धकमा नियुक्त गरिसकेको छ । कम्पनीको आईपीओ बिक्री नभएमा नागरिक लगानी कोष र मेगा क्यापिटलले प्रत्याभूति गर्ने सम्झौता भएको छ ।
कम्पनीको हाल चुक्ता पूँजी ८ अर्ब ४० करोड रुपैयाँ छ । उसले एक अर्ब ६० करोड रुपैयाँ बराबरको आईपीओ निष्काशन गर्ने छ । प्रथमिक शेयर निष्कासन पछि कम्पनीको चुक्ता पूँजी १० अर्ब पुग्नेछ ।