आगामी जेठदेखि क्युआरकोड सहितको अस्थायी लाइसेन्स दिने भनिएपनि काठमाडौं उपत्यकामा भएको निषेधाज्ञाको कारण आवश्यक सामाग्री आपुर्ति हुन नसकेपछि उक्त प्रक्रिया केही समयको लागि स्थगित भएको हो ।
विभागले गत हप्तादेखि सवारी प्रयोगात्मक परिक्षा ट्रायल तथा सवारी अनुमति पत्र आवेदनमा रोक लगाएपछि आगामी जेठबाट वितरण गर्ने भनिएको अस्थायी लाइसेन्स कार्ड छपाइ पछि धकेलिने भएको हो ।
गत बर्ष लकडाउनको मौका छोपी विभागले ८ लाख स्मार्टलाइसेन्स छपाइ गरेको थियो । तर, यो पटक भने लाइसेन्स छपाइ गर्नको लागि स्मार्टकार्ड नै विभागसँग अभाव छ ।
विभागका अनुसार नयाँ स्मार्टलाइसेन्स ६ लाख भन्दा बढी छाप्न बाँकी छ भने नयाँ लाइसेन्स आवेदन १३ लाखभन्दा माथि रहेको छ ।
यातायात विभागका निर्देशक लोकनाथ भुसालले अब ७ हजार मात्रै स्मार्ट कार्ड रहेको र त्यो पनि विदेश जाने र अत्यावश्यक व्यक्तिलाई मात्रै उपलब्ध गराइएको जनकारी दिए ।
नयाँ स्मार्ट कार्ड आयातको लागि अगाडि बढेको टेन्डर प्रक्रिया र अस्थाइ लाइसेन्स पनि कोरोना भाइरसको दोस्रो लहरको कारण भएको निषेधाज्ञाले प्रभावित बनाएको भुसालको भनाई छ ।
उपत्यकाका यातायात कार्यालयमा अस्थायी लाइसेन्स छपाइ गर्न मेसिन समेत अहिलेसम्म उपलब्ध गराइएको छैन । उपत्यकामा भएको दुई साता निषेधाज्ञाले यातायात सेवालाई अझ धेरै प्रभावित बनाएको छ ।
स्मार्ट लाइसेन्स र यातायातका अन्य सेवामा प्रदेश यातायात कार्यालय र यातायात व्यवस्था विभागवीच समन्वय नहुँदा सेवाग्राहीले वारम्बार सेवामा झन्झट व्यहोर्न बाध्य छन् ।
अहिले यातायात व्यवस्था विभागसँग न ठूलो मात्रामा स्मार्टलाइसेन्स छपाइ गर्ने मेसिन छ न त झन पेचिलो बन्दै गाएको यातायात सेवालाई भरपर्दो र सरल बनाउने कुनै रणनीति नै ।
यातायात विभागले ट्रायल पास गरेको एक महिना भित्र लाइसेन्स उपलब्ध गराउने भन्ने बिषय नारामै सिमित भएको छ । सवारी अनुमति पत्रको अस्थायी लाइसेन्स पनि कारोना तथा निषेधाज्ञाले रोकेपछि लाइसेन्समापनि ठूलो चाप पर्ने निश्चित छ ।
