चालु आर्थिक वर्षको चैत मसान्तसम्ममा लघुवित्तले ५ करोड १४ लाख रुपैयाँ खुद नाफा आर्जन गरेको छ। यो गत आर्थिक वर्षको सोही अवधिको तुलनामा ४०.६२ प्रतिशत कम हो। गत आर्थिक वर्षको सोही अवधिसम्ममा लघुवित्तले ८ करोड ६६ लाख रुपैयाँ खुद नाफा कमाएको थियो।
खुद ब्याज आम्दानी र सञ्चालन मुनाफा घटेसँगै निष्क्रिय कर्जा बढेको र खराब कर्जा कम उठाएका कारण लघुवित्तको नाफा घट्न पुगेको हो।
समीक्षा अवधिमा लघुवित्तको खुद ब्याज आम्दानी ४.५७ प्रतिशत घटेको छ भने कुल सञ्चालन आम्दानी ६.१० प्रतिशत घटेको छ। त्यसैगरी, समीक्षा अवधिमा लघुवित्तको सञ्चालन मुनाफा ३३.७८ प्रतिशत घटेको छ।
नाफासँगै लघुवित्तको प्रतिशेयर आम्दानी पनि घटेको छ। समीक्षा अवधिमा लघुवित्तको यस्तो आम्दानी ११ रुपैयाँ ९५ पैसा घटेर १७ रुपैयाँ ४७ पैसामा झरेको छ। चैत मसान्तसम्ममा लघुवित्तको मूल्य आम्दानी अनुपात ७७.०१ गुणा रहेको छ भने प्रतिशेयर नेटवर्थ १९५ रुपैयाँ ८७ पैसा रहेको छ।
समीक्षा अवधिमा लघुवित्तको चुक्ता पूँजीमा कुनै परिवर्तन भएको छैन भने जगेडा कोष १०५.९३ प्रतिशत बढेको छ। लघुवित्तको सापटी ३.९८ प्रतिशत, निक्षेप १८.७४ प्रतिशत र कर्जा १८.०४ प्रतिशत बढेको छ।
