चालु आर्थिक वर्षको पुस मसान्तसम्ममा कम्पनीले १७ करोड ८३ लाख रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा ५ करोड ४ लाख रुपैयाँले कम हो । गत आर्थिक वर्षको यसै अवधिसम्ममा कम्पनीले २२ करोड ८७ लाख रुपैयाँ खुद नाफा कमाएको थियो ।
कम्पनीको विद्युत बिक्री आम्दानीसँगै वित्तीय आम्दानी पनि घटेका कारण खुद नाफा घट्न पुगेको हो।
समीक्षा अवधिमा कम्पनीको विद्युत बिक्री आम्दानी ४१ करोड ३९ लाख रुपैयाँ रहेको छ । यो अवधिमा कम्पनीको विद्युत बिक्री आम्दानी एक करोड ७६ लाख रुपैयाँ घटेकाे हो । यस अवधिमा कम्पनीको वित्तीय आम्दानी दुई करोड ७० लाख रुपैयाँ रहेको छ । गत आर्थिक वर्षको यसै अवधिमा कम्पनीले ५ करोड ७३ लाख रुपैयाँ वित्तीय आम्दानी गरेको थियो ।
कम्पनीले सार्वजनिक गरेको वित्तीय विवरण अनुसार कम्पनीको प्रतिशेयर आम्दानी १० रुपैयाँ ४६ पैसा छ । पुस मसान्तसम्ममा कम्पनीको मूल्य आम्दानी अनुपात २९.६३ गुणा रहेको छ भने प्रतिशेयर नेटवर्थ २०६ रुपैयाँ ७३ पैसा रहेको छ ।
