राजनीतिबाट विरक्तिएपछि पदबाट हटाइदिन अनुरोध गर्दै मन्त्री बुढा, नहटाए आफै राजीनामा दिने, अब कहिल्यै चुनाव नलड्ने

May 19, 2024 04:10 PM Merolagani

मन्त्री बन्नको लागि राजनीतिक पार्टीका नेताहरुबीच निकै चर्काे हानथाप हुने गर्छ । तर, अहिले एकजना त्यस्ता मन्त्री भेटिएका छन्, जस्ले आफूलाई ‘मन्त्री हुने रहर पुग्यो, मलाई हटाएर अर्काेलाई मन्त्री बनाइदेउ’ भन्दै पार्टी नेताहरुसँग हार गुहार गरेका छन् । 

उनले जेठ १५ गते भित्र पार्टीले आफूलाई फिर्ता बोलाएर अर्काे कसैलाई मन्त्री बनाइदिन पार्टी नेतृत्वलाई ‘अल्टिमेटम’ नै दिएका छन् ।

ती मन्त्री हुन्-शहरी विकास मन्त्री धनबहादुर बुढा । नेकपा एकीकृत समाजवादीबाट मन्त्री बनेका बुढाले पार्टी अध्यक्ष माधव नेपाल र घनश्याम भुसाललाई भेटेर मन्त्रीबाट हटाउन अनुरोध गरेका हुन्।

स्रोतका अनुसार गत साता बसेको संसदीय दलको बैठकमै उनले आफू मन्त्री पद त्याग्न तयार रहेको बताएका थिए । त्यसलगत्तै अहिले नेताहरुलाई भेटेर १५ गते भित्र फिर्ता नबोलाए आफूले राजीनामा दिने बताएका हुन् ।

स्रोतका अनुसार आफूले किन राजीनामा दिन लागेको हो भनेर बुढाले स्पष्ट रुपमा केही बताएका छैनन् । तर, उनले आफू निकटका व्यक्तिहरुलाई आफूलाई पार्टी नेताहरुबाट धेरै दबाव आएको र त्यो सहन मुस्किल परेको तथा मन्त्री बनेपछि आफ्नो व्यवसाय पनि लथालिङ्ग भएकोले त्यसलाई सम्हाल्न राजीनामा दिन लागेको बताउने गरेका छन् ।

'क' श्रेणीका निर्माण व्यवसायी समेत रहेका बुढा यार्सागुम्बाका पनि चर्चित व्यापारी हुन् । उनले एक पटक राज्य मन्त्री र एक पटक ‘फूलमन्त्री’ बनेपछि राजनीति गर्ने आफ्नो रहर सकिएको बताउने गर्छन् । त्यहीअनुसार अब आफू चुनाव नलड्ने घोषणा गरिसकेका छन् ।

राप्रपाबाट एमाले प्रवेश गरी २०७० मा पहिलोपटक सांसद बनेका बुढा त्यसयता लगातार डोल्पाबाट चुनाव जितिरहेका छन् । उनी यसअघि रविन्द्र अधिकारी पर्यटनमन्त्री भएका बेला केही समय राज्यमन्त्री बनेका थिए ।

comments powered by Disqus